بین الاقوامی پانیوں میں امریکی فوج کی مسلسل کارروائیاں جاری ہیں اور حال ہی میں ایک اور کارروائی کرتے ہوئے فوج نے وینزویلا کے ایک اور خام تیل بردار بحری جہاز کو تحویل میں لے لیا ہے جو رواں ماہ ضبط کیا جانیوالا تیسرا آئل ٹینکر ہے۔
غیر ملکی میڈیا کے مطابق وینزویلا کے حکام کے مطابق یہ بحری جہاز اسوقت خالی تھا اور وینزویلا واپس جا رہا تھا کہ امریکی حکام نے اپنی تحویل میں لے لیا، وینزویلا کی جانب سے اس اقدام کو بین الاقوامی قوانین کی خلاف ورزی قرار دیا جا رہا ہے جبکہ امریکی حکام کا موقف ہے کہ یہ کارروائی وینزویلا پر عائد پابندیوں کے تحت عمل میں لائی گئی ہے۔
دوسری جانب امریکا نے وینزویلا کیخلاف ممکنہ فوجی کارروائی کے پیش نظر اپنی عسکری سرگرمیوں میں نمایاں اضافہ کر دیا ہے، مرسیڈیٹا ہوائی اڈے پر امریکی فوجی سرگرمیاں تیز ہو گئی ہیں جہاں میکینکس کو بحری بیڑے کی تیاریوں میں مصروف دیکھا گیا ہے جبکہ ایک سپر سٹالین ہیلی کاپٹر کی اڑان بھی ریکارڈ کی گئی ہے۔
ٹرمپ انتظامیہ نے خطے میں طاقت کے اظہار کیلئے طیارہ بردار بحری جہاز، جنگی بحری جہاز، جدید لڑاکا طیارے اور ہزاروں فوجی کیریبین کے علاقے میں تعینات کر دئیے ہیں ان اقدامات کو وینزویلا پر دبائو بڑھانے کی حکمت عملی کا حصہ قرار دیا جا رہا ہے۔
امریکی صدر ڈونلڈ ٹرمپ اس سے قبل متعدد مواقع پر بیان دے چکے ہیں کہ وینزویلا میں زمینی فوجی کارروائی کے امکانات کو رد نہیں کیا جا سکتا، سیاسی اور دفاعی ماہرین کے مطابق امریکا کی حالیہ بحری اور فضائی نقل و حرکت خطے میں ایک ممکنہ بڑے تصادم کی جانب اشارہ کر رہی ہے، اس صورتحال کے پیش نظر عالمی برادری کی نظریں امریکا اور وینزویلا کے درمیان بڑھتی ہوئی کشیدگی پر مرکوز ہیں جبکہ خطے میں کسی بھی ممکنہ فوجی اقدام کے اثرات کو دور رس قرار دیا جا رہا ہے۔
