خیبرپختونخوا حکومت نے تعلیمی معیار میں بہتری، فی طالبعلم اخراجات میں کمی کیلئے سرکاری سکولوں کو مرحلہ وار آئوٹ سورس کرنے کا فیصلہ کرلیا۔
جاری دستاویزات کے مطابق خیبرپختونخوا کے سرکاری سکولوں میں اس وقت فی طالب علم 3ہزار 517 روپے ماہانہ خرچ ہو رہے ہیں، آئوٹ سورسنگ کے بعد یہ خرچ کم ہو کر ایک ہزار 667روپے ماہانہ رہ جائے گا۔
دستاویز کے مطابق ہر سکول کیلئے ماہانہ 3لاکھ روپے کا خصوصی بجٹ مختص کرنے کی تجویز دی گئی ہے، محکمہ تعلیم نے خراب کارکردگی دکھانے والے سکولوں اور طلبہ کی شناخت کا عمل مکمل کرلیا ہے، صوبے کے 4ہزار 147سکولوں میں 40فیصد طلبہ کی کارکردگی غیر تسلی بخش پائی گئی ہے۔
دستاویز کے مطابق آئوٹ سورسنگ منصوبہ 3مراحل میں مکمل کیا جائے گا ،پہلے مرحلے میں 500سکول، دوسرے میں 1ہزار سکول اور تیسرے مرحلے میں 2 ہزار سکول آئوٹ سورس کئے جائیں گے۔
منصوبے کے تحت ہر آئوٹ سورس شدہ سکول میں طلبہ کی تعداد 40سے بڑھا کر 180کی جائیگی۔
دستاویز کے مطابق صوبے میں اس وقت 49 لاکھ کے قریب بچے سکولوں سے باہر ہیں، آئوٹ سورسنگ کے نتیجے میں تعداد میں کمی متوقع ہے۔
