مسلم لیگ (ن) نے پنجاب اسمبلی میں افغان اشتعال انگیزی کے موثر و بھرپور جواب پر پاک فوج کے حق میں خراجِ تحسین پیش کرنے کی قرارداد جمع کرادی گئی۔
لیگی رکن صوبائی اسمبلی حنا پرویز بٹ کی جانب سے جمع کروائی گئی قرارداد کے متن میں کہا گیاہے کہ یہ ایوان فیلڈ مارشل جنرل عاصم منیر کی بہادر، مدبر اور جرات مند قیادت کو زبردست خراجِ تحسین پیش کرتا ہے۔
قرارداد میں کہا گیا کہ پاک فوج نے مشکل حالات میں جس پیشہ ورانہ مہارت، نظم و ضبط اور عزم کا مظاہرہ کیا ہے، وہ پوری قوم کیلئے باعث فخر ہے۔
ایوان وزیراعظم کے اس واضح عزم کی مکمل تائید کرتا ہے کہ پاکستان کے دفاع، خودمختاری اور قومی سلامتی پر کسی قسم کا سمجھوتا نہیں کیا جائے گا۔
قرارداد میں وزیراعلی پنجاب مریم نواز کے اس بیان کو سراہا گیا جس میں انہوں نے افغان جارحیت کی سخت مذمت کرتے ہوئے کہا تھا کہ پاکستان کی سرحدیں مقدس امانت ہیں اور ان کی حفاظت ہر شہری کا فرض ہے۔
قرارداد میں کہا گیا ہے کہ افغان جارحیت کے جواب نے یہ ثابت کر دیا کہ پاکستان امن پسند ملک ہے مگر یہ ہماری کمزوری نہیں بلکہ طاقت اور استقامت کی علامت ہے۔
ایوان نے اس عزم کا اظہار کرتا ہے کہ پوری قوم اپنی بہادر مسلح افواج کے ساتھ سیسہ پلائی دیوار کی طرح متحد کھڑی ہے۔ قرارداد میں حکومتی اراکین نے قرارداد کی مکمل حمایت کرتے ہوئے فوج کے کردار کو خراجِ تحسین پیش کیا ہے۔
