حکومت پنجاب نے لاہور میں پاکستان کے سب سے بڑے ویسٹ واٹر ٹریٹمنٹ پلانٹ کی منظوری دیدی۔
ترجمان محکمہ ہائوسنگ کے مطابق بابو صابو ویسٹ واٹر ٹریٹمنٹ پلانٹ کو سی ڈی ڈبلیو پی نے منظور کر لیا ہے، منصوبے کے تحت سیوریج واٹر کو صاف کر کے دریائے راوی میں ڈالا جائے گا۔
ترجمان نے بتایا کہ منصوبے کیلئے بابو صابو کے مقام پر 836ایکڑ اراضی 1992-93ء میں حاصل کی گئی تھی۔
ترجمان نے بتایا کہ منصوبے کا کل تخمینہ لاگت 52ارب روپے ہے جو تقریبا ساڑھے چار سال میں مکمل ہوگا۔ پہلے مرحلے میں فرانس کے ڈونر ادارے اے ایف ڈی کے تعاون سے کینٹ ڈرین، ملتان روڈ اور گلشن راوی کے سیوریج کو صاف کیا جائے گا۔
ترجمان کے مطابق پہلے مرحلے میں یومیہ 88ملین گیلن پانی صاف کیا جا سکے گا جبکہ منصوبے کی کل استعداد یومیہ 198ملین گیلن ہو گی۔
