معروف پاکستانی پلے بیک گلوکارہ حمیرا چنا نے پاکستانی میوزک انڈسٹری میں موجود تعصبات، اقربا پروری اور لیجنڈز کو نظرانداز کرنے پر آواز اٹھاتے ہوئے کہا ہے کہ پاکستانی میوزک انڈسٹری میں اقربا پروری بہت زیادہ ہے، مخصوص فنکاروں کے گرد ہی تمام مواقع گھومتے رہتے ہیں جبکہ باصلاحیت اور تجربہ کار گلوکاروں کو مسلسل نظرانداز کیا جاتا ہے۔
انہوں نے کہا کہ انڈسٹری میں بہت زیادہ فیورٹ ازم ہے چند مخصوص ناموں کیساتھ بار بار کام کیا جاتا ہے اور باقی باصلاحیت فنکاروں کو بھلا دیا جاتا ہے، میں خود اس جانبداری کا شکار رہی ہوں، یہ افسوسناک ہے مگر حقیقت یہی ہے، انڈسٹری کو چاہئے کہ وہ سب کو ساتھ لیکر چلے اور ان فنکاروں کو بھی مواقع دے جو واقعی اپنے فن سے واقف ہیں۔
مزید گفتگو کرتے ہوئے حمیرا چنا نے لیجنڈ فنکاروں کے ساتھ ہونے والے رویے پر تنقید کرتے ہوئے کہا کہ لوگ کہتے ہیں کہ آپ لیجنڈ ہیں، ٹھیک ہے ہم لیجنڈ ہیں، مگر کیا کبھی کسی نے یہ سوچا کہ لیجنڈز کے پاس کام بھی ہے یا نہیں؟ جب کوئی فنکار دنیا سے چلا جاتا ہے تو تب کہا جاتا ہے کہ اگر وہ زندہ ہوتے تو ہم انہیں یہ گانا دیتے یا اگر کوئی بھارت سے واپس آ جائے تو اچانک وہ اسٹار بن جاتا ہے۔
