لاہور: لاہور ہائیکورٹ میں پی ٹی آئی اور پاکستان عوامی تحریک کے2014ء کے دھرنے کیخلاف درخواستیں 10سال بعد سماعت کیلئے مقرر کردی گئیں۔تفصیلات کے مطابق لاہور ہائیکورٹ میں پی ٹی آئی اور پاکستان عوامی تحریک کے 2014ء کے دھرنے کیخلاف درخواستیں 10 سال بعد سماعت کیلئے مقرر کر دی گئیں۔
رجسٹرار آفس کی جانب سے جاری کاز لسٹ کے مطابق چیف جسٹس عالیہ نیلم کی سربراہی میں 3 رکنی فل بینچ 10 اکتوبر کو درخواست پر سماعت کرے گا۔ واضح رہے کہ 2014ء میں بانی پی ٹی آئی اور سربراہ پاکستان عوامی تحریک طاہر القادری کیخلاف درخواستیں درخواست گزار اے کے ڈوگر سمیت دیگر نے دائر کی تھیں جن میں عوامی تحریک، جماعت اسلامی، پیپلز پارٹی سمیت دیگر کو فریق بنایا گیا تھا۔
درخواست گزار کا مؤقف تھا کہ عدالتی حکم کے باوجود عمران خان اور طاہر القادری نے لاہور سے اسلام آباد کی طرف دھرنا دیا، دونوں رہنماؤں نے طویل دھرنا دے کر توہین عدالت کی، لہٰذا عدالت ان کیخلاف توہین عدالت کی کارروائی کرے۔یاد رہے کہ دھرنے کیخلاف درخواست دائر کرنے والے وکیل اے کے ڈوگر انتقال کر چکے ہیں۔
