اداکار فیروز خان کا دوسری اہلیہ ڈاکٹر زینب سے متعلق متنازع انسٹاگرام اسٹوری کے بعد اکاونٹ ہیک ہوگیا ۔ فیروز خان نے اپنے انسٹاگرام اکاونٹ پر ایک متنازع اسٹوری شیئر کی، جس میں انہوں نے اپنی دوسری اہلیہ ڈاکٹر زینب کو ٹیگ کرتے ہوئے سنجیدہ نوعیت کے الزامات عائد کیے۔
یہ اسٹوری بعد میں ڈیلیٹ کردی گئی، تاہم اس کے اسکرین شاٹس تیزی سے سوشل میڈیا پر وائرل ہوگئے۔ لیکن چند گھنٹوں بعد فیروز خان نے اپنے اسی اکاونٹ سے وضاحت دیتے ہوئے کہا کہ ان کا اکاونٹ ہیک کرلیا گیا تھا۔
واضح رہے وائرل ہونے والی پوسٹ میں فیروز خان نے دعوی کیا کہ انہیں زبردستی اور دباو ڈال کر اس رشتے میں رکھا گیا، جب کہ ان کی والدہ اور بہن کے ساتھ ناانصافی کے بعد یہ رشتہ ان کے لیے ختم ہوچکا ہے۔
انہوں نے سٹوری میں لکھا کہ مجھ پر دباو ڈالا جارہا تھا کہ وہ اپنی والدہ اور بچوں کا ساتھ نہ دیں ورنہ ان پر جھوٹے الزامات عائد کیے جائیں گے۔ فیروز خان نے اہلیہ کو ٹیگ کرتے ہوئے یہ بھی لکھا کہ گھر واپس مت آنا، شکریہ۔ اسٹوری میں مزید کہا گیا کہ وہ یہ سب اس لیے شیئر کر رہے ہیں کیونکہ سب کو کسی نہ کسی وقت مدد کی ضرورت پڑتی ہے اور انہیں یقین ہے کہ ان کے چاہنے والے ان پر اعتماد کریں گے۔
اداکار نے یہ بھی لکھا کہ وہ ہمیشہ پروجیکٹس میں مہذب رویہ اختیار کرتے رہے ہیں، کبھی کسی کو ناراض نہیں کیا اور انہیں یہ خوف نہیں کہ لوگ انہیں پہچانیں گے یا نہیں۔ یاد رہے کہ فیروز خان نے جون 2024 میں ماہر نفسیات ڈاکٹر زینب سے شادی کی تھی۔
