پاکستان اور مصر نے سکیورٹی و دفاعی تعلقات مزید مضبوط کرنے کا اعادہ کیا ہے۔
یہ اعادہ پاکستان کے سرکاری دورے پر آئے ہوئے مصری وزیر خارجہ بدر احمد محمد کی پاکستانی ہم منصب محمد اسحاق ڈار کیساتھ وفود کی سطح پر ملاقات میں کیا گیا، ملاقات میں وزیر خارجہ اسحاق ڈار نے مصر کیساتھ تعلقات مزید مستحکم کرنے کا اعادہ کیا۔
مصری وزیر خارجہ نے اسلام آباد اور پشاور میں حالیہ دہشتگردی کے واقعات میں جاں بحق افراد کے اہلخانہ سے تعزیت اور زخمی ہونیوالوں سے اظہار یکجہتی کیا۔
اس موقع پر وزیر خارجہ اسحاق ڈار کا کہنا تھا کہ دونوں ممالک کے درمیان ہمیشہ سے بردرانہ تعلقات رہے ہیں، مصر اور پاکستان کی دوستی عالمی سطح پر جانی جاتی ہے، ہماری ذمہ داری ہے کہ دونوں سفارتی، معاشی، تجارتی، کاروباری، سکیورٹی اور دفاعی تعلقات کو مزید مستحکم کریں۔
مصری وزیر خارجہ نے پاکستانی ہم منصب کا شکریہ ادا کرتے ہوئے کہا کہ ہم دہشتگردی اور انتہا پسندی کیخلاف پاکستان کی جنگ میں اسکے شانہ بشانہ کھڑے ہیں، مصر اور پاکستان کو معیشت، سکیورٹی اور سیاسی نقشے کے حوالے سے ایک جیسے ہی چیلنجز کا سامنا ہے جس پر ہمیں ملکر کام کرنا ہوگا، استحکام، امن اور ترقی دونوں ممالک کے سٹریٹجک تعلقات میں ستون کی مانند رکھتے ہیں۔
