اسلام آباد: قومی اسمبلی میں اپوزیشن لیڈر عمر ایوب نے کہا ہے کہ مذاکرات کیلئے حکومت کے پلے کچھ نہیں ،وزراء کے ہوش اڑے ہوئے ہیں،ملک کو آئی پیز چنگل میں پھنسانے والے کیوں مگرمچھ کے آنسو بہا رہے ہیں؟ ۔تفصیلات کے مطابق ایک بیان میں رہنماء پی ٹی آئی عمر ایوب نے کہا کہ ملک کو آئی پیز کے چنگل میں (ن) لیگ نے پھنسایا ہے، کپیسٹی چارجزکے مہنگے معاہدے خود کئے گئے اب نگران وزراء کیوں مگرمچھ کے آنسو بہا رہے ہیں؟۔
انہوں نے کہا کہ نگراں حکومت کو ہمارے پیچھے ویگوڈالے لگانے سے ہی فرصت نہ تھی، ان کے وزراء پیزے اور پیسٹریاں کھانے میں مصروف تھے۔ انہوں نے کہا کہ دنیا میں بجلی کی پیداواری لاگت کم ہمارے ہاں زیادہ ہے، ہم نے اپنے دورمیں آئی پی پیزکے ساتھ معاہدوں پرنظرثانی کی اور آئی پی پیزکیلئے ڈالرریٹ 175روپے پرفکس کر کے اربوں ڈالر بچائے جبکہ قطرکے ساتھ ایل این جی معاہدے پرنظرثانی کر کے 10ارب ڈالرسے زائد بچائے گئے۔
انہوں نے کہا کہ مذاکرات کیلئے حکومت کے پلے کچھ بھی نہیں ہے، وزراء کے ہوش اڑے ہوئے ہیں، یہ آپس میں دست وگریبان ہیں۔
