اسلام آباد: وفاقی وزیرداخلہ محسن نقوی نے کہا ہے کہ انسانی سمگلنگ انسانی حقوق، وقار ،آزادی کی صریحا خلاف ورزی ہے،سمگلرز لالچ میں ہزاروں لوگوں کی زندگیوں سے کھیلتے ہیں ،ایف آئی اے گینگز کی سرکوبی کیلئے ہمہ وقت چوکس ہے، کئی ملزمان قانون کی گرفت میں لائے جاچکے ہیں۔
تفصیلات کے مطابق انسانی سمگلنگ کی روک تھام کے عالمی دن پر جاری بیان میں وزیر داخلہ محسن نقوی نے کہا کہ بے روزگاری، غربت اور دولت کی غیرمساوی تقسیم سے انسانی سمگلنگ میں اضافہ ہوا ہے، ترقی پذیر ممالک کوانسانی سمگلنگ کا سب سے زیادہ سامنا ہے،پاکستان میں بھی انسانی سمگلنگ کے منظم گینگ سرگرم ہیں۔
انہوں نے کہا کہ ایف آئی اے ان گینگز کی سرکوبی کیلئے ہمہ وقت چوکس ہے اور متعدد ملزمان کو قانون کی گرفت میں لایا جا چکا ہے، انسانی سمگلنگ کی روک تھام کیلئے اقوام عالم کو کثیر جہتی مشترکہ اقدامات اٹھانا کی اشد ضرورت ہے۔
انہوں نے کہا کہ انسانی سمگلنگ انسانی حقوق، وقار اور آزادی کی صریحا خلاف ورزی ہے،انسانی سمگلرز لالچ میں ہزاروں لوگوں کی زندگیوں سے کھیلتے ہیں ان کے ہاتھوں کئی خاندان اپنے پیاروں سے جدا ہو چکے ہیں۔ انہوں نے کہا کہ ترقی یافتہ اور ترقی پذیر ممالک کو گھناؤنے جرم کے خلاف اکٹھے کھڑے ہونا ہو گا۔
