اسلام آباد: سابق وفاقی وزیر فواد چودھری نے کہا ہے کہ پی ٹی آئی حکومتی مذاکراتی پیشکش کو مثبت لے، عمران کے آرمی چیف کے نام پیغام سے بیرون ملک بیٹھ کر پی ٹی آئی کا نام استعمال کر کے پروپیگنڈاکرنیوالے یتیم ہوگئے ہیں۔
اسلام آباد میں میڈیا سے گفتگو کرتے ہوئے سابق وفاقی وزیر فواد چودھری نے کہا کہ حکومت کو ہر صورت گھر جانا ہے، تین چار ماہ میں رخصت ہوجائے گی۔انہوں نے کہا کہ آنیوالے 40، 45دنوں میں صورت حال واضح ہو جائے گی۔انہوں نے کہا کہ حکومت کی طرف سے کسی قسم کی مذاکرات کی پیشکش کو پی ٹی آئی کی جانب سے مثبت طریقے سے نمٹنا چاہئے، ملک میں سیاسی ماحول بہتر ہونا چاہئے۔
انہوں نے کہا کہ بانی پی ٹی آئی کا آرمی چیف کو پیغام نہایت خوش آئند ہے، اس سے پی ٹی آئی کا نام استعمال کر کے بیرون ملک بیٹھ کر سوشل میڈیا پر پروپیگنڈا کرنے والے یتیم ہوگئے۔انہوں نے کہا کہ بچوں کو گرفتار کر کے اپنا بیانیہ بنانے کی ناکام کوشش کی جارہی ہے۔
