اسلام آباد: وفاقی وزیر توانائی اویس لغاری نے کہا ہے کہ بجلی قیمت میں کمی کیلئے اقدامات جاری ہیں، آئی پی پیزمعاہدے کسی صورت تبدیل نہیں کریں گے، معاہدے یکطرفہ ختم کر کے ریکوڈک کی طرح 900 ملین ڈالر جرمانہ ادا نہیں کرسکتے۔
تفصیلات کے مطابق نجی ی وی سے گفتگو کرتے ہوئے وزیر توانائی اویس لغاری نے کہا کہ بجلی کی قیمت میں کمی کیلئے اقدامات کر رہے ہیں ، آئی پی پیز سے کیپیسٹی ادائیگیوں سے متعلق مذاکرات کئے جا سکتے ہیں تاہم معاہدوں کو کسی صورت تبدیل نہیں کریںگے۔
انہوں نے کہا کہ آئی پی پیز سے معاہدے یکطرفہ طور پر ختم کر کے ریکوڈک کی طرح 900ملین ڈالر کا جرمانہ ادا نہیں کر سکتے۔ انہوں نے کہا کہ ڈالر 2015ء کے ریٹ پر رہتا تو کیپیسٹی ادائیگیاں 2100ارب روپے کے بجائے 800ارب روپے ہوتیں۔
انہوں نے بتایا کہ دورہ چین میں پاور سیکٹر کو چینی قرضے کی ری پروفائلنگ کیلئے بات ہوئی ہے۔ انہوں نے کہا کہ چینی پاور پلانٹس کو مقامی کوئلے پر منتقلی سے ڈھائی روپے فی یونٹ کمی آ سکتی ہے، قرضوں کی ری پروفائلنگ سے جتنا فائدہ ہوگا صارفین کو پہنچائیں گے۔ انہوں نے کہا کہ جامشورو پاور پلانٹ کو ہم خود مقامی کوئلے پر منتقل کر رہے ہیں۔
