اسلام آباد: مشیر اطلاعات خیبرپختونخوا بیرسٹر سیف نے کہا ہے کہ سیاست کے میدان میں ہمارا کوئی مقابلہ نہیں کرسکتا، فائدہ لینے کی کوشش کرنیوالے معاملات بگاڑ رہے ہیں،یہ ایک گھنٹے کی مار ہیں، ہمیں لیول پلیئنگ دی جائے،پاکستان کے مفاد میں جو کچھ ہوگا اس کیلئے کھڑے رہیں گے۔
تفصیلات کے مطابق نجی ٹی وی پروگرام میں گفتگو کرتے ہوئے مشیر اطلاعات خیبرپختونخوا بیرسٹر سیف نے کہا کہ ہم نے کبھی بھی فوج کے خلاف نفرت پھیلانے کی کوشش نہیں کی، ہمیشہ سپورٹ کیا،بانی پی ٹی آئی کئی بار کہہ چکے کہ کسی ادارے سے کوئی لڑائی نہیں، کچھ لوگوں کے ساتھ ذاتی اختلاف کی گنجائش ہوتی ہے اور ماضی سے رہی ہے۔
انہوں نے کہا کہ لوگوں سے اختلاف ہماری پولیٹیکس کا حصہ ہے، ہم نے کسی کے خلاف جارحانہ انداز میں بیان بازی نہیں کی، بانی پی ٹی آئی کئی بار کہہ چکے کہ پاکستان کی خاطر بات کیلئے تیار ہوں۔ انہوں نے کہا کہ ہم نے کسی کو کوئی نیا پیغام نہیں دیا۔
انہوں نے کہا کہ سیاست کے میدان میں ہمارا کوئی مقابلہ نہیں کرسکتا، فائدہ لینے کی کوشش کرنیوالے معاملات بگاڑ رہے ہیں یہ چاہتے ہیں پی ٹی آئی ، اسٹیبلشمنٹ کے اختلافات ہوں تاکہ یہ مزے کرتے رہیں۔ انہوں نے کہا کہ ہمیں کالعدم قرار دینے کی کوشش کی جا رہی ہے، یہ ہمارے لئے ایک گھنٹے کی مار ہیں، ہمیں لیول پلیئنگ فیلڈدی جائے۔
انہوں نے کہا کہ ہماری شکایات دور کی جائیں، بنوں میں معاملات سنبھال لئے، راضی نامہ ہوگیا لیکن امیر مقام اور عطا تارڑ کہنے لگے کہ یہ تو پی ٹی آئی نے کیا ہے، پاکستان کے مفاد میں جو کچھ ہوگا ہم اس کیلئے کھڑے رہیں گے۔
