پشاور: مشیر اطلاعات خیبرپختونخوا بیرسٹر سیف نے کہا ہے کہ نا اہل ٹولے نے عزم استحکام بارے فوج، عوام میں دوریاں پیدا کرنے کی کوشش کی،خیبرپختونخوا کو 590 ارب روپے دینے بارے وزیراعظم کا بیان جھوٹ پر مبنی ہے،این ایف سی بقایاجات تاحال نہیں ملے۔
تفصیلات کے مطابق ایک بیان میں مشیر اطلاعات خیبرپختونخوا بیرسٹر سیف نے کہا کہ خیبرپختونخوا کو 590ارب روپے دینے بارے وزیراعظم شہباز کا بیان جھوٹ پر مبنی ہے، یہ رقم 2010ء میں سوات آپریشن کے بعد تعمیر و بحالی کے کاموں پر خرچ ہوئی، این ایف سی کے تحت بقایا جات تاحال نہیں ملے۔
انہوں نے کہا کہ نااہل ٹولہ دہشت گردی جیسے معاملے پر بھی سیاست کر رہا ہے، عزم استحکام بارے نااہل ٹولے نے فوج اور عوام میں دوریاں پیدا کرنے کی کوشش کی۔ انہوں نے کہا کہ دہشت گردی صرف خیبر پختونخوا نہیں پورے ملک کا مسئلہ ہے، خاتمے کی ذمہ داری وفاق کی ہے۔
