کراچی: چیف آف نیوی سٹاف ایڈمرل نوید اشرف نے کہا ہے کہ مسلح افواج دہشتگردی کو جڑ سے اکھاڑ پھینکنے کی طاقت رکھتی ، اس کیلئے پرعزم ہیں ،بدلتی علاقائی جیو پولیٹکس ،بڑھتی دہشتگردی ملکی معیشت، سلامتی پر براہ راست اثر انداز ہورہی ہے، جدید اسٹیلتھ خصوصیات سے لیس ہنگورکلاس آبدوز کی شمولیت خطے میں پاکستان نیوی کی صلاحیت بڑھائے گی۔تفصیلات کے مطابق پاکستان نیول اکیڈمی میں 121ویں مڈل شپ مین کی پاسنگ آؤٹ پریڈ کا انعقاد کیا گیا جس میں 70مڈشپ مین اور 28ایس ایس سی کیڈٹس فارغ التحصیل ہوئے۔ تقریب سے خطاب کرتے ہوئے چیف آف نیول سٹاف ایڈمرل نوید اشرف نے کہا کہ پاکستان کو اندرونی، بیرونی محاذ پرکثیرجہتی سکیورٹی چیلنجز کا سامنا ہے، تیزی سے بدلتی علاقائی جیو پولیٹکس ،بڑھتی دہشتگردی ملکی معیشت، سلامتی پر براہ راست اثر انداز ہورہی ہے۔
انہوں نے کہا کہ پاکستان کی مسلح افواج دہشتگردی کو جڑ سے اکھاڑ پھینکنے کی طاقت رکھتی ہیں اور اس کیلئے پرعزم ہیں۔انہوں نے کہا کہ جیواسٹرٹیجک اہمیت کے باعث بحرہند مستقبل کے تنازعات کے ممکنہ میدان کے طورپر ابھر رہا ہے، اس صورتحال کے اثرات خطے اور اس سے آگے تک ہوسکتے ہیں، میری ٹائم کے تحفظ اورصورتحال سے نمٹنے کیلئے پاک بحریہ جدیدٹیکنالوجی حاصل کررہی ہے۔
انہوں نے کہا کہ پاکستان کی سمندری حدودکے تحفظ کیلئے ہنگور کلاس آبدوز کا حصول انتہائی اہم ہے، ہنگورکلاس آبدوز کی شمولیت خطے میں پاکستان نیوی کی صلاحیت بڑھائے گی۔ انہوں نے بتایا کہ ہنگورکلاس آبدوز جدید اسٹیلتھ خصوصیات سے لیس ہے اور یہ کثیرجہتی خطرات سے نمٹنے کی صلاحیت رکھتی ہے۔
انہوں نے کہا کہ آرٹیفیشل انٹیلی جنس والے پلیٹ فارمز اور دیگر ٹیکنالوجیز سکستھ جنریشن وارفیئرکا اشارہ دے رہے ہیں۔ انہوں نے کہا کہ دہشت گردی اور انتہا پسندی کیخلاف پاکستانی قوم اور فورسز متحد ہیں،پاکستان نیوی علاقائی امن کیلئے دیگر ممالک کی بحریہ کیساتھ شراکت داری کررہی ہے۔
