اسلام آباد : رہنماء پی ٹی آئی شیر افضل مروت نے عمر ایوب کے پارٹی عہدہ چھوڑنے کا خیر مقدم کرتے ہوئے کہا ہے کہ پارٹی کے اہم عہدوں پر فائز چند دیگر افراد کو بھی اس کی پیروی کرنی چاہئے، شبلی فراز کے استعفے سے پارٹی قبضہ مافیا کے چنگل سے آزاد ہوگی ۔
تفصیلات کے مطابق ایک بیان میں رہنماء پی ٹی آئی شیر افضل مروت نے عمر ایوب کے پارٹی کے سیکرٹری جنرل کا عہدہ چھوڑنے کا خیر مقدم کرتے ہوئے شبلی فراز سے استعفے کا مطالبہ کیا ہے۔
انہوں نے کہا کہ پارٹی کے اہم عہدوں پر فائز چند دیگر افراد کو بھی ان کی پیروی کرنی چاہئے، شبلی فراز کے استعفے سے پارٹی قبضہ مافیا کے چنگل سے آزاد ہوگی۔انہوں نے کہا کہ شبلی فراز کو ہٹایا گیا تو وعدہ کرتا ہوں پارٹی وقت کی ضرورت کے مطابق اٹھے گی، پارٹی کارکن مجھے میدان میں چاہتے ہیں تو میرے مطالبے کے حق میں آواز بلند کریں۔انہوں نے پارٹی قیادت ایک بھی کام پورا کرنے میں ناکام رہی، بانی پی ٹی آئی جیل میں ہیں اور مینڈیٹ کی بازیابی ابھی دور ہے، ہماری خواتین اور رہنماء جیلوں میں بند ہیں۔انہوں نے کہا کہ ہم عوام کو ایک عظیم تحریک کیلئے متحرک کرنے میں ناکام رہے ہیں، بلے کے نشان اور مخصوص نشستوں سمیت کئی مثالیں سامنے ہیں جہاں پارٹی قیادت ناکام رہی۔انہوں نے کہا کہ پارٹی کی کور کمیٹی اور سیاسی کمیٹیاں فیورٹ پر مشتمل ہوتی ہیں مگر یہاں پارٹی کے فیصلے میرٹ پر نہیں ہوتے۔
