اسلام آباد: وزیراعظم شہباز شریف نے خان یونس میں اسرائیلی بربریت کی شدید مذمت کرتے ہوئے کہا ہے کہ فلسطین میں انسانی المیہ جنم لے چکا ہے، اقوام متحدہ سمیت عالمی برادری اپنی ذمہ داریاں پوری کرے،جنگی جرائم کا محاسبہ کر کے اسرائیل کو انصاف کے کٹہرے میں کھڑا کیا جائے۔
تفصیلات کے مطابق ایک بیان میں وزیراعظم شہباز شریف نے فلسطین کے علاقے خان یونس میں جاری اسرائیلی فورسز کی پرتشدد کارروائیوں کی شدید مذمت کرتے ہوئے کہا ہے کہ خان یونس میں اسرائیلی بربریت کے باعث ڈیڑھ لاکھ سے زائد فلسطینی بے گھر ہوچکے ہیں، محاصرے سے علاقے میں اشیائے خورونوش و دیگر ضروریات زندگی کی فراہمی معطل ہو کر رہ گئی ہے۔
انہوں نے کہا کہ فلسطین میں انسانی المیہ جنم لے چکا ہے، اقوام متحدہ سمیت عالمی برادری اپنی ذمہ داریاں پوری کرے۔ انہوں نے کہا کہ اسرائیلی فورسز فلسطینیوں کی نسل کشی کے سنگین جرم کا ارتکاب کر رہی ہے، پاکستان نے عالمی عدالت انصاف میںفلسطینیوں کے حق خود ارادیت اور اسرائیل کی جانب سے فلسطینیوں پر ڈھائے جانے والے مظالم پر بھرپور آواز اٹھائی ہے، ہم یہ مطالبہ دہراتے ہیں کہ عالمی عدالتی انصاف کے فلسطین کی صورتحال بارے حالیہ فیصلے اور اقوام متحدہ کی قراردادوں پر عملدرآمد کرایا جائے۔
انہوں نے بتایا کہ اب تک پاکستان سے پاکستان ایئر فورس کے 6 جہازوں کے ذریعے 1200ٹن اور 3بحری جہازوں کے ذریعے 1500ٹن امدادی سامان فلسطین بھجوایا جا چکا ہے، پاکستان کے میڈیکل کالجز میں فلسطین کے میڈیکل کے طلباء کیلئے خصوصی انتظام کی ہدایت کی ہے تاکہ وہ اپنی تعلیم کا سلسلہ جاری رکھ سکیں۔
انہوں نے کہا کہ عالمی برادری اسرائیلی جنگی جرائم کا محاسبہ کرتے ہوئے اسے انصاف کے کٹہرے میں کھڑا کرے، پاکستانی حکومت اور عوام فلسطینی بھائیوں اور بہنوں کے ساتھ ہیں۔
