لاہور: سی ٹی ڈی نے رواں ماہ پنجاب کے مختلف شہروں میں آپریشنز کے دوران داعش، ٹی ٹی پی کمانڈرز سمیت 38 دہشت گرد گرفتار کرلئے ۔تفصیلات کے مطابق سی ٹی ڈی نے رواں ماہ پنجاب کے مختلف شہروں میں مختلف کارروائیوں کے دوران داعش اورکالعدم ٹی ٹی پی کمانڈرز سمیت 38 دہشت گردوں کو گرفتار کرلیا۔
ترجمان سی ٹی ڈی کے مطابق دہشت گردی کے خدشات کے پیش نظر سی ٹی ڈی نے پنجاب کے مختلف شہروں لاہور،رحیم یارخان،نارووال،راولپنڈی،ملتان ،جھنگ، سرگودھا، خانیوال، وہاڑی،بہاولپور، لودھراں اور بہاولنگر میں 449انٹیلی جنس بیسڈ آپریشنز میں رواں ماہ کے دوران 38دہشت گرد گرفتار کئے۔
ترجمان کے مطابق کارروائیوں میں لودھراں سے کالعدم ٹی ٹی پی کا تربیت یافتہ دہشتگرد، بہاولپور سے داعش کااہم کمانڈر بھی گرفتار کیا گیا۔ ترجمان کے مطابق دہشتگردوں سے دھماکہ خیز مواد،ہینڈ گرینیڈ ،اسلحہ ،موبائل فون اور نقدی برآمد کی گئی ہے۔ ترجمان نے بتایا کہ گرفتار دہشت گرد قانون نافذ کرنے والے اداروں اوراہم تنصیبات پرحملے کی منصوبہ بندی کررہے تھے۔
