لاہور: امیر جماعت اسلامی حافظ نعیم الرحمن نے کہا ہے کہ ملکی سیاسی جماعتیں وارثت وصیت پر چل رہی ہیں، پارلیمنٹ میں موجود لوگوں کا جمہوریت ، آئین سے تعلق نہیں، جمہوریت کے فروغ کیلئے ایکشن عمل کو یرغمال بننے سے روکنا ہوگا۔
تفصیلات کے مطابق لاہور ہائیکورٹ بار سے خطاب کرتے ہوئے امیر جماعت اسلامی حافظ نعیم الرحمن نے کہا کہ پارلیمنٹ میں موجود لوگوں کا جمہوریت اور آئین سے کوئی تعلق نہیں ہے، جمہوریت کو فروغ دینے کیلئے الیکشن عمل کو یرغمال بننے سے روکنا ہوگا، جاگیردار، وڈیرے اور سرمایہ دار نظام کو طاقت سے اس عمل کو یرغمال بنالیتے ہیں۔انہوں نے کہا کہ ملک میں سیاسی جماعتوں میں جمہوریت نہیں، کوئی وراثت تو کوئی وصیت پر چل رہی ہے، جمہوریت صرف جماعت اسلامی اور وکلا میں ہے جہاں الیکشن ہوتے ہیں۔
انہوں نے کہا کہ پاکستان کے مقاصد اور نظریئے کی تکمیل کی تحریک کسی صورت پیچھے نہیں جانی چاہئے، پاکستان اپنی اصل اور حقیقی منزل پر پہنچے گا، اس کیلئے عدل اور انصاف کی بالادستی کا نظام قائم کرنا ہوگا، عدل کے نظام میں صرف اسلام نہیں اقلیتوں کی بھی فلاح ہے۔ انہوں نے کہا کہ دہشت گردی کے خلاف امریکی جنگ میں شرکت سے ہمارے حالات خراب ہوئے۔
