لاہور: سابق وزیر اعلی پنجاب پرویز الٰہی کی اہلیہ قیصرہ الٰہی نے خاندانی صلح کی تردید کرتے ہوئے کہا ہے کہ پرویز الٰہی کی رہائی میں چودھری شجاعت کا کوئی کردار نہیں ،انہیں واضح پیغام دیا چوری شدہ مینڈیٹ کی واپسی تک بات نہیں ہوگی، شجاعت کے بیٹے جھوٹ پھیلانے میں مصروف ہیں، نہ جانے افواہیں پھیلا کر کیا مقاصد حاصل کرنا چاہتے ہیں۔
تفصیلات کے مطابق ایک بیان میں سابق وزیراعلی پنجاب پرویز الٰہی کی اہلیہ قیصرہ الٰہی نے خاندانی صلح کی تردید کرتے ہوئے کہا ہے کہ چودھری شجاعت کا پرویز الٰہی کی رہائی میں کوئی کردار نہیں ، ان کی رہائی اللہ کے کرم سے ہوئی ، عدالتوں نے انصاف فراہم کیا ہے۔
انہوں نے کہا کہ پرویز الٰہی نے شجاعت کو پیغام دیا ہے کہ ہمارے چوری شدہ مینڈیٹ کی واپسی تک کوئی بات نہیں ہو گی۔انہوں نے کہا کہ مونس الٰہی ہی نہیں بلکہ پرویز الٰہی بھی پی ٹی آئی کے ساتھ رہیں گے، سابق وزیراعلی نے حالیہ بیان میں بھی اس بات کو واضح انداز میں کہا ہے۔
انہوں نے کہا کہ پرویز الٰہی (ق )لیگ میں جانے کو تیار ہیں نہ ایسا ہو گا، (ق) لیگ ایسی جماعت بن چکی ہے جو چوری کے مینڈیٹ پر قائم ہے، کوئی بھی عقل اور شعور رکھنے والا (ق) لیگ کا ممبر نہیں بن سکتا۔انہوں نے کہا کہ چودھری شجاعت کے دونوں بیٹے ہمارے خلاف جھوٹ پھیلانے میں مصروف ہیں، نہ جانے یہ ایسی افواہیں پھیلا کر کیا مقاصد حاصل کرنا چاہتے ہیں۔
