لاہور: وزیراعلی پنجاب مریم نواز نے کہا ہے انٹرپرینیورشپ کے کلچر کے فروغ کیلئے سازگار ماحول کی فراہمی ترجیحات میں شامل ہے،ایس ایم ایز کی برآمدی صلاحیتیں بڑھا کر عالمی منڈیوں تک رسائی آسان بنائی جا رہی ہے۔تفصیلات کے مطابق مائیکرو، سمال اینڈ میڈیم انٹرپرنیورشپ کے عالمی دن پر اپنے پیغام میں وزیراعلی پنجاب مریم نواز نے کہا کہ آج چھوٹے کاروبار اور انٹرپرنیورشپ میں جدت کی حوصلہ افزائی اور فروغ کیلئے اقدامات کے عزم کا دن ہے، سمال اینڈ میڈیم انٹرپرائزز معیشت کی ریڑھ کی ہڈی ہیں۔
انہوں نے کہا کہ پنجاب حکومت کاروبار دوست پالیسیوں کے ذریعے ایس ایم ایز کو ترقی دینے اور سازگار ماحول پیدا کرنے کیلئے پرعزم ہے، چھوٹے کاروباروں میں سرمایہ کاری اقتصادی استحکام و معاشی خوشحالی کیلئے ضروری ہے۔ انہوں نے کہا کہ حکومت ایم ایس ایم ایز کو درپیش چیلنجز پر قابو پانے اور مدد فراہم کرنے کیلئے اقدامات کر رہی ہے، چھوٹے اور درمیانے درجے کے کاروباروں کیلئے لاجسٹک سپورٹ، ٹیکنالوجی اور منڈیوں تک رسائی بڑھانے پر خصوصی توجہ کی ضرورت ہے، ایس ایم ایز صرف اقتصادی ترقی ہی نہیں بلکہ معاشی عدم مساوات کم کرنے میں کردار ادا کرتے ہیں۔
انہوں نے کہا کہ پنجاب میں ایس ایم ایز کے ذریعے روزگار کے بڑے مواقع میسر ہیں، ایس ایم ایز کا مینوفیکچرنگ، خدمات اور تجارت میں متنوع آپریشنز کے ذریعے پنجاب کی جی ڈی پی میں نمایاں شیئر ہے، ایس ایم ایز کی برآمدی صلاحیت سے غیر ملکی زرمبادلہ میں اضافہ ہوتا ہے۔
انہوں نے کہا کہ پنجاب حکومت زراعت ، لائیو سٹاک اور گارمنٹس سمیت ہر شعبے میں ایس ایم ایز کی حوصلہ افزائی کر رہی ہے، زرعی قرض فراہم کر کے کاشتکاری کو فروغ دینے کیلئے خصوصی اقدامات کئے گئے ہیں، ڈیجیٹل ٹیکنالوجیز اور ای کامرس پلیٹ فارمز کے ذریعے ترقی کے مواقع سامنے آئیں گے۔
انہوں نے کہا کہ انٹرپرینیورشپ کے کلچر کے فروغ کیلئے سازگار ماحول کی فراہمی پنجاب حکومت کی ترجیحات میں شامل ہے،ایس ایم ایز کی برآمدی صلاحیتیں کو بڑھا کر عالمی منڈیوں تک رسائی آسان بنائی جا رہی ہے۔
