راولپنڈی: بانی پی ٹی آئی کی بہن علیمہ خان نے بتایا ہے کہ عمران خان نے فوج سے نیوٹرل ہونے کا مطالبہ کرتے ہوئے کہا ہے کہ (ن) لیگ اور پیپلز پارٹی اخلاقی طور پر ہار چکے ہیں، فوج پاکستان کی ریڑھ کی ہڈی ہے، نہیں چاہتے فوج اور عوام کو آمنے سامنے کیا جائے۔
تفصیلات کے مطابق اڈیالہ جیل کے باہر میڈیا سے گفتگو کرتے ہوئے بانی پی ٹی آئی کی بہن علیمہ خان نے کہا کہ آج جیل میں ہمارے وکلا کو اندر جانے نہیں دیا گیا، جج صاحب کو پولیس والوں نے بتایا کہ وکلاء نہیں آئے اور وہ سماعت برخاست کرکے کمرہ عدالت سے چلے گئے۔
انہوں نے کہا کہ ہماری ملاقات بانی پی ٹی آئی سے ہوئی ہے،انہوں نے کہا ہے کہ (ن) لیگ اور پیپلز پارٹی اخلاقی طور ہار چکے ہیں، موجودہ حکومت چاہتی ہے کہ پی ٹی آئی اور فوج آمنے سامنے ہوں۔انہوں نے بتایا کہ عمران خان نے کہا ہے کہ فوج پاکستان کی ریڑھ کی ہڈی ہے، ہم نہیں چاہتے فوج اور عوام کو آمنے سامنے کیا جائے،فوج نیوٹرل ہوجائے۔
انہوں نے کہا کہ ملک میں رول آف لا اور جمہوریت نہیں ہوگی تو ملک آگے کیسے چلے گا؟، ملک میں کاروبار تباہ ہوچکا ہے، لوگ ملک چھوڑ کر چلے گئے۔ انہوں نے کہا کہ عمران خان نے مطالبہ کیا ہے کہ 9مئی کی سی سی ٹی وی فوٹیجز نکالی جائیں، معلوم ہو جائے گا کہ 9مئی کا ذمہ دار کون ہے؟ ،بیگناہ لوگوں کو چھوڑا جائے، اصل ملزمان کے خلاف کیسز چلائے جائیں۔
