کراچی(انٹرنیوز) رہنماء پیپلز پارٹی شیری رحمن نے کہا ہے کہ صدر زرداری کی قیادت اور وژن کی وجہ سے پاکستان کا جمہوری سفر جاری ہے،انتقامی کارروائیوں کے باعث ایک دہائی سے زائد جیل میں گزارنے کے باوجود وہ جمہوریت، آئین کی حکمرانی کیلئے پرعزم ہیں۔
تفصیلات کے مطابق صدر آصف زرداری کی سالگرہ پر انہیں مبارکباد دیتے ہوئے نائب صدر پیپلز پارٹی سینیٹر شیری رحمن نے کہاکہ پاکستان کے سیاسی منظر نامے میں صدر آصف زرداری کا کردار ہمیشہ مرکزی اور انتہائی اہم رہا ہے، پاکستان اور جمہوریت کو مستحکم کرنے میں ان کا سیاسی کردار قابل تعریف ہے، اقتدار میں آ کر انہوں نے صدر کے اختیارات پارلیمنٹ کو منتقل کئے،18ویں ترمیم کے ذریعے صوبوں کو خودمختار بنایا، خیبرپختونخوا کو پہچان دی ،بلوچستان کو آغاز حقوق بلوچستان دیا، ان کی قیادت اور وژن کی وجہ سے پاکستان کا جمہوری سفر جاری ہے۔
انہوں نے کہا کہ انتقامی کارروائیوں کی وجہ سے جیل میں ایک دہائی سے زائد کا عرصہ گزارنے کے باوجود وہ جمہوریت اور آئین کی حکمرانی کیلئے پرعزم ہیں۔انہوں نے کہا کہ صدر مملکت کی سالگرہ پر ان کی صحت، خوشیوں اور کامیابیوں کیلئے دعاء گو ہوں۔
