اسلام آباد : پی ٹی آئی نے وزیراعظم کی مذاکرات کی پیشکش کو بانی پی ٹی آئی ودیگر رہنماﺅں کی رہائی سے مشروط کرتے ہوئے کہا ہے کہ یہ ہاﺅس اس وقت چل سکے گا جب ہمارا احترام ہوگا،مفاہمت تب ہوگی جب یاسمین راشد، محمود الرشید کےساتھ زیادتی کا احساس کریں گے ۔
تفصیلات کے مطابق وزیراعظم شہباز شریف کے خطاب کے بعد قومی اسمبلی میں اظہار خیال کرتے اپوزیشن لیڈر عمر ایوب نے کہا کہ میں فارم 47کے وزیراعظم کو کہنا چاہتا ہوں بات تب ہوگی جب میرا وزیراعظم باہر آئے گا، بات تب ہوگی جب میرے قیدی باہر آئیں گے۔انہوں نے کہا کہ یہ ہاﺅس اس وقت چل سکے گا جب ہمارا احترام ہوگا۔
وزیراعظم نے اپنی والدہ کے جنازے کا ذکر کیا، ہم کلثوم نواز کے جنازے میں شریک ہوئے تھے مگر میں اپنے والد کے جنازے میں شریک نہیں ہوسکا۔انہوں نے کہاکہ مفاہمت تب ہوگی جب آپ یاسمین راشد، محمود الرشید کیساتھ زیادتی کا احساس کریں گے، مفاہمت تک ہوگی جب آپ حسان نیازی کے ساتھ زیادتی کا احساس کریں گے۔
بعدازاں سپیکر قومی اسمبلی نے کہا کہ آپ بیٹھ جائیں آپ کو موقع دے دیا اور جواب آگیا ہے، آپ کے نام پر کوئی کٹ موشن نہیں ہے۔
