اسلام آباد : وزیراعظم شہباز شریف نے چینی صنعتوں کی پاکستان منتقلی کیلئے جوائنٹ وینچر کی منظوری دیتے ہوئے کہا ہے کہ چین کی ٹیکسٹائل ، چمڑے ، فٹ ویئر و دیگر صنعتوں کی پاکستان میں ری لوکیشن بارے استعداد موجود ہے۔
تفصیلات کے مطابق وزیراعظم شہباز شریف کی زیر صدارت سرمایہ کاری بورڈ کے امور پر اہم اجلاس کا انعقاد ہوا جس میں وزیر نجکاری و سرمایہ کاری عبد العلیم خان ،وزیر تجارت جام کمال، وزیر خزانہ و محصولات محمد اورنگزیب، وزیر پٹرولیم مصدق ملک، وزیراعظم کے کوآرڈنیٹر رانا احسان افضل و متعلقہ اعلی سرکاری افسران نے شرکت کی۔سیکرٹری سرمایہ کاری بورڈ نے بریفنگ دیتے ہوئے بتایا کہ چینی صنعتوں کی پاکستان میں ری لوکیشن بارے اقدامات اٹھائے جا رہے ہیں، اسلام آباد بزنس فیسیلیٹیشن مرکز کے قیام کیلئے چینی ماہرین کی خدمات حاصل کی جا رہی ہیں، آسان کاروبار ایکٹ کا مسودہ جلد کابینہ کمیٹی برائے لیجسلیٹو کیسز میں بھیجا جا رہا ہے۔
اس موقع پر وزیراعظم شہباز شریف نے چینی صنعتوں کی پاکستان منتقلی کیلئے جوائنٹ وینچر کی منظوری دیتے ہوئے کہا ہے کہ پاکستان میں اندرونی و بیرونی سرمایہ کاری کا فروغ حکومت کی اولین ترجیح ہے، حکومت تاجروں اور سرمایہ کاروں کیلئے کاروبار دوست ماحول فراہم کرنے کیلئے ہر ممکن اقدامات اٹھا رہی ہے۔
انہوں نے کہا کہ چین کی ٹیکسٹائل ، چمڑے ، فٹ ویئر اور دیگر صنعتوں کی پاکستان میں ری لوکیشن کے حوالے سے بہت استعداد موجود ہے۔وزیراعظم نے دورہ چین کے دوران شینزین میں پاکستانی و چینی کمپنیوں کے درمیان مفاہمتی یادداشتوں بارے پیشرفت پر جامع رپورٹ پیش کرنے کی ہدایت کرتے ہوئے خصوصی اقتصادی زونز ون سٹاپ شاپ کے قانون کے مسودہ پر دورہ چین کے بعد ہونیوالی پیشرفت کے تناظر میں نظر ثانی کا حکم دیا۔
