اسلام آباد:اسلام آباد ہائیکورٹ نے بانی پی ٹی آٹی عمران خان کو جیل میں عالمی قوانین کے مطابق سہولیات فراہمی کی درخواست پر فریقین کو نوٹس جاری کردیئے۔ تفصیلات کے مطابق اسلام آباد ہائیکورٹ میں چیف جسٹس عامر فاروق نے بانی پی ٹی آئی عمران خان کو جیل میں عالمی قوانین کے مطابق سہولیات فراہمی کی اعتراضی درخواست پر سماعت کی۔
درخواست گزار اظہر صدیق ایڈووکیٹ عدالت کے روبر حاضر ہوئے ۔چیف جسٹس نے درخواست گزار سے کہا آپ کی درخواست پر رجسٹرار آفس کے اعتراضات تھے جو دور کردیئے ہیں۔ اظہر صدیق ایڈووکیٹ نے موقف اپنایا سابق وزیر اعظم کو ملنے والی سہولیات جیل رولز، ہائی کورٹ رولز اور عالمی قوانین کے خلاف ہیں، یہاں پر جیل سہولیات سے متعلق مرکزی کیس کیساتھ اس درخواست کو منسلک کیا جائے۔
انہوں نے کہا کہ یہ درخواست صرف عمران خان کی حد تک نہیں بلکہ اہلیہ بشری بی بی کی حد تک بھی ہے۔بعد ازاں عدالت نے سپرنٹنڈنٹ اڈیالہ جیل سمیت تمام فریقین کو نوٹسز جاری کرتے ہوئے کیس کی سماعت یکم اگست تک ملتوی کردی۔
