اسلام آباد: آئی ایم ایف نے پاکستان کو برآمدات بڑھانے میں دیگر ممالک سے کمزور قرار دیتے ہوئے کہا ہے کہ مقامی صنعتوں کی پیداوار بڑھانے ،ویلیو ایڈیشن کیلئے جدید ٹیکنالوجی اپنانا ہو گی۔تفصیلات کے مطابق ایم آئی ایف نے اپنی ایک رپورٹ میں کہا ہے کہ بنگلا دیش، بھارت، ویتنام، تھائی لینڈ و دیگر ممالک کی نسبت پاکستان کی برآمدات انتہائی کم ہیں، ادائیگیوں پر پابندی، درآمدات کیلئے ٹیرف اور نان ٹیرف رکاوٹیں، ایکسچینج ریٹ پاکستان کی کم برآمدات کی بنیادی وجوہات ہیں۔
رپورٹ میں کہا گیا ہے کہ پاکستان کو برآمدات و درآمدات کیلئے عالمی مارکیٹس میں مقابلے کے رجحان کی فضاء کو دیکھنا چاہئے، برآمدات بڑھانے کیلئے مقامی صنعت کی پیداوار میں مزید ویلیو ایڈیشن کی ضرورت ہے جس کیلئے جدید ٹیکنالوجی اپنانا ہو گی۔رپورٹ کے مطابق پاکستان کو ٹیکسٹائل، ایگریکلچر پراڈکٹس کے علاوہ دیگر شعبوں میں بھی برآمدات بڑھانا ہوں گی۔
