اسلام آباد: نائب وزیراعظم و وزیر خارجہ اسحاق ڈار نے کہا ہے کہ عالمی طاقتوں میں مخاصمت دنیا میں چیلنجز بڑھا رہی ہے، غزہ ،مقبوضہ کشمیر میں مظالم جاری ،اسلامو فوبیا کا خطرہ منڈلا رہا ہے،عدم مساوات، عالمی دہشتگردی و جرائم کا مقابلہ کوئی ملک اکیلے نہیں کرسکتا،عالمی سیاست و تاریخ کے تناظر میں پاکستان کو احتیاط سے قدم اٹھانے ہیں۔
تفصیلات کے مطابق اسلام آباد میں تقریب سے خطاب کرتے ہوئے نائب وزیراعظم و وزیر خارجہ اسحاق ڈار نے کہا کہ انسٹیٹیوٹ آف اسٹریٹجک اسٹڈیز غیر معمولی تھنک ٹینک ہے، یہ ادارہ علاقائی اور عالمی امور پر غیر معمولی کردار ادا کر رہا ہے۔
انہوں نے کہا کہ معیاری تحقیق کی وجہ سے اس انسٹیٹیوٹ کا اہم کردار ہے، تزویراتی اور خارجہ امور پالیسی پر اس انسٹیٹیوٹ کا کام بہترین ہے، عالمی سیاست میں ایک دور ختم ہو رہا ہے تو نیا دور شروع ہو رہا ہے، دنیا میں ملٹی پولیرٹی کا تصور ابھر رہا ہے۔
انہوں نے کہا کہ غزہ میں بچوں اور عورتوں کی نسل کشی جاری ہے، مقبوضہ کشمیر میں مظالم کا سلسلہ جاری ہے، اسلامو فوبیا کا خطرہ منڈلا رہا ہے۔ انہوں نے کہا کہ ماحولیاتی تبدیلیوں کا بڑا چیلنج دنیا کو درپیش ہے، عالمی تعاون اور یکجہتی کو نظر انداز کیا جا رہا ہے، عالمی طاقتوں میں مخاصمت دنیا میں چیلنجز کو بڑھا رہی ہے۔
انہوں نے کہا کہ نئی سرد جنگ کا خوف دنیا کو ڈرا رہا ہے، پاکستان ایک تزویراتی جگہ پر موجود ہے اور اس قدرتی طور پر اس ماحول سے متاثر ہو رہا ہے۔ انہوں نے کہا کہ عدم مساوات، عالمی دہشتگردی اور بین الاقوامی جرائم کا مقابلہ کوئی ملک اکیلے نہیں کرسکتا،عالمی سیاست و تاریخ کے تناظر میں پاکستان کو احتیاط سے قدم اٹھانے ہیں۔
