اسلام آباد: پاکستان میں امریکی سفیر ڈونلڈ بلوم نے پاکستان میں معاشی اصلاحات کی ضرورت پر زور دیتے ہوئے کہاہے کہ پاکستانی معیشت حساس موڑ پر کھڑی ہے، پاکستان میں شہری آزادی کی پاسداری کے خواہاں ہیں، مختلف شعبوں میں سرمایہ کاری کررہے ہیں اور کرتے رہیں گے۔
تفصیلات کے مطابق اسٹریٹجک اسٹڈی نسٹیٹیوٹ میں پاک امریکہ تعلقات پر سیمینار سے خطاب کرتے ہوئے پاکستان میں متعین امریکی سفیر ڈونلڈ بلوم نے کہا کہ امریکہ کیلئے پاکستان سے تعلقات بہت اہم ہیں،ہم دہشت گردی کیخلاف پاکستان کی قربانیوں کو تسلیم کرتے ہیں تاہم پاکستانی معیشت حساس موڑ پر کھڑی ہے جس میں اصلاحات کی ضرورت ہے۔
انہوں نے کہا کہ پاکستان میں اظہار رائے کی آزادی کا احترام بہت اہم ہے،ہم پاکستان میں شہری آزادی کی پاس داری چاہتے ہیں۔ انہوں نے کہا کہ گزشتہ برس پاک امریکا تجارت کا حجم 9 ارب ڈالر سے زائد تھا ،پاکستان نے 6ارب ڈالر کا مال برآمد کیا۔
انہوں نے بتایا کہ ہم منگلا ڈیم کو نئے ٹربائنزکے ساتھ اپ گریڈ کر رہے ہیں، پینے صاف پانی کی فراہمی کیلئے 25کروڑ ڈالر کی سرمایہ کاری کی جارہی ہے، آئندہ بھی سرمایہ کاری کرتے رہیں گے۔ انہوں نے بتایا کہ ہم صحت عامہ کے شعبے میں بھی پیسہ لگارہے ہیں جبکہ تعلیم کو بھی ترجیح دے رہے ہیں۔
انہوں نے کہا کہ امریکہ گندھارا تہذیب کے ورثے کے تحفظ کیلئے بھی فنڈنگ کر رہا ہے، صوبوں کو انصاف اور سیکورٹی کیلئے ایک ارب ڈالر دیئے جارہے ہیں جبکہ افغان پناہ گزینوں کی بھی مدد کی جارہی ہے۔
انہوں نے کہا کہ یہ خیال غلط ہے کہ پاک امریکہ تعلقات کا محور سیکیورٹی مسائل ہیں، امریکہ نے کئی سال سے پاکستان کو قدرت آفات بالخصوص سیلاب سے نپٹنے میں مدد دی ہے۔
