اسلام آباد: وفاقی کابینہ نے دوست ممالک کے کاروباری افراد ،شہریوں کو ڈیجیٹل ویزا فری انٹری کی منظوری دیدی جبکہ عارف علوی ، عمران خان، قاسم سوری پر آرٹیکل 6 لگانے، پی ٹی آئی پر پابندی کا معاملہ موخر کردیا گیا۔
تفصیلات کے مطابق وزیراعظم شہباز شریف کی زیرصدارت وفاقی کابینہ کا اجلاس ہوا جس میں وفاقی وزراء ومتعلقہ حکام نے شرکت کی، اجلاس میں6نکاتی ایجنڈے پر غور کیا گیا۔ کابینہ نے وزارت داخلہ کی سمری پر 126دوست ممالک کے کاروباری افراد اور شہریوں کو ڈیجیٹل ویزا فری انٹری کی منظوری دی، اجلاس میں ایس ای سی پی ایکٹ 1997کے تحت خصوصی عدالتوں کے قیام، نجکاری کمیشن کے بورڈ کے اراکین کی تعداد میں اضافے ،متروکہ وقف املاک بورڈ کے چیئرمین کی تعیناتی اور پاکستان، ڈنمارک کے درمیان ایم او یو پر دستخط کی بھی منظوری دی گئی۔
ذرائع کے مطابق اجلاس میں وفاق کی 2021-22ء اور 2022-23ء کیلئے پالیسیوں پر عملدرآمد کی رپورٹ بھی پیش کی گئی۔
ذرائع کے مطابق اجلاس میں عارف علوی، عمران خان ،قاسم سوری پر آرٹیکل 6لگانے اور پی ٹی آئی پر پابندی کا معاملہ زیر غور نہیں لایا گیا۔ذرائع کے مطابق حکومت نے معاملے پر پیپلز پارٹی اور اتحادی جماعتوں سے مشاورت کے بعد معاملہ کابینہ میں پیش کرنے کا فیصلہ کیاہے۔
