سرگودھا: سرگودھا میں شادی شدہ خاتون سے شادی کیلئے نوجوان نے خاتون کا 5 سالہ بیٹا قتل کردیا ۔ تفصیلات کے مطابق سرگودھا میں شادی شدہ خاتون سے محبت کرنیوالے نوجوان نے خاتون کا 5سالہ بیٹا اغواء کرکے قتل کردیا۔قتل کی واردات کے بعد ملزم خاتون کے شوہر کو گمنام فون کے ذریعے بچے کی واپسی کیلئے بیوی کو طلاق کا پیغام بھجواتا رہا، پولیس نے ملزم گرفتار کرلیا۔ پولیس کے مطابق نواحی گاؤں 107شمالی کے محنت کش رحمن علی کے 5سالہ بیٹے شاہزیب کو گزشتہ برس ستمبر میں اغوا کیا گیا تھا، مقدمہ درج کرکے بچے کی تلاش شروع کی گئی تاہم کئی ماہ تک مغوی بچے کا سراغ نہ لگ سکا۔پولیس نے بتایا کہ 5سالہ مغوی شاہزیب کی والدہ کے گاؤں کے مکرم نامی نوجوان کے ساتھ تعلقات تھے اور وہ شوہر اور بچوں کو چھوڑ کر کئی مرتبہ مکرم کیساتھ جا چکی ہے ، دونوں آپس میں شادی کے بھی خواہشمند تھے لیکن شادی کے بعد خاتون کا بیٹا مکرم کے والدین ساتھ رکھنے کو تیار نہیں تھا جس پر ملزم مکرم نے شادی میں رکاوٹ بننے پر 5سالہ شاہزیب کو اغوا کیا اور گلا دباء کر لاش نہر میں بہا دی۔
پولیس کے مطابق موبائل ڈیٹا حاصل کرنے کے بعد تفتیش سے ملزم مکرم ہی شاہزیب کا قاتل نکلا جس نے اعتراف کیا کہ اس نے خاتون سے شادی کیلئے اس کے بیٹے کو قتل کیا۔ پولیس کے مطابق شاہزیب کی والدہ بیٹے کے قتل سے بے خبر تھی۔
