لاہور: پنجاب حکومت نے پی ٹی آئی کارکنان کیخلاف 9 مئی 2023ء سے اب تک جاری ایم پی او آرڈرز کی تفصیلات لاہور ہائیکورٹ میں جمع کرا دیں۔ تفصیلات کے مطابق چیف سیکرٹری پنجاب زاہد اختر زمان نے لاہور ہائیکورٹ میں پی ٹی آئی کارکنان کیخلاف 9مئی 2023سے اب تک جاری کئے گئے ایم پی او آرڈرز کی تفصیلات جمع کرا دیں ۔
رپورٹ کے مطابق 9مئی 2023 سے اب تک پی ٹی آئی کارکنان سمیت دیگر کیخلاف 3ہزار 532ایم پی او آرڈرز جاری کئے گئے اور 4ہزار 770افراد کو ان احکامات کے تحت نظر بند کیا گیا ہے۔رپورٹ کے مطابق راولپنڈی، گوجرانوالہ اور لاہور میں سب سے زیادہ ایم پی او آرڈرز جاری کئے گئے جبکہ ملتان، لاہور اور راولپنڈی میں سب سے زیادہ افراد کو ان کے تحت گرفتار کیا گیا ہے۔
رپورٹ کے مطابق راولپنڈی میں 348، گوجرانوالہ میں 328اور لاہور میں 301ایم پی او آرڈرز جاری کئے گئے، ملتان میں 739، لاہور میں 642اور راولپنڈی میں 384افراد کو نظر بند کیا گیا۔ رپورٹ کے مطابق مجموعی طور پر 3ہزار 511افراد ایم پی او آرڈرز واپس لینے پر رہا ہوئے۔
