اسلام آباد : بانی پی ٹی آئی عمران خان نے نااہلی کیخلاف زیر التواء اپیل پر جلد سماعت کیلئے سپریم کورٹ میں درخواست دائر کردی۔ تفصیلات کے مطابق بانی پی ٹی آئی عمران خان نے نا اہلی کیخلاف زیر التواء اپیل پر جلد سماعت کیلئے وکیل علی ظفر کے توسط سے سپریم کورٹ میں درخواست دائر کردی۔
درخواست میں موقف اپنایا گیا ہے کہ عمران خان سابق وزیراعظم اور سب سے بڑی سیاسی جماعت کے سربراہ ہیں، درخواست گزار کو الیکشن کمیشن کی جانب سے نااہل کرنے کے بعد پارٹی سربراہ کے عہدے سے ہٹانے کی کارروائی جاری ہے، الیکشن کمیشن کے احکامات کیخلاف اسلام آباد اور لاہور ہائی کورٹ میں مقدمات زیر التوا ہیں، سپریم کورٹ میں زیر التوا کیس کی وجہ سے ہائی کورٹس میں کارروائی آگے نہیں بڑھ پا رہی ہے۔
درخواست میں کہا گیا ہے کہ ان مقدمات کی وجہ سے درخواست گزار ممبر اسمبلی منتخب نہیں ہو پا رہے نہ ضمنی انتخابات میں حصہ لے سکتے ہیں۔ استدعا ہے کہ بانی پی ٹی آئی کی نا اہلی کیخلاف اپیل جلد سماعت کیلئے مقرر کی جائے۔
