لاہور : سپیکر پنجاب اسمبلی ملک احمد خان نے سابق لیگی رہنماء محمد زبیر کے الزامات پر عدالت سے سوموٹو لینے، جوڈیشل کمیشن بنانے کامطالبہ کرتے ہوئے کہا ہے کہ یہ کیسی ملاقات تھی جس کا علم صرف محمد زبیر کو ہے، فریقین ان کیخلاف قانونی کارروائی کا حق رکھتے ہیں، وضاحت دیں ملاقات کب اور کیسے ہوئی؟ ، دھرنوں نے عدم استحکام کے علاوہ کچھ نہیں دیا، اسمبلی قانون سازی مسائل کے حل پر غور کا فورم ہے، دوران کارروائی ذمہ دارانہ طرز عمل کا مظاہرہ ہونا چاہئے۔
تفصیلات کے مطابق لاہور میں میڈیا سے گفتگو کرتے ہوئے سپیکر پنجاب اسمبلی ملک احمد خان نے کہا کہ میں ہمیشہ سے دھرنوں کا مخالف رہا ہوں، ان دھرنوں نے عدم استحکام کے علاوہ کیا نتائج دیئے ہیں، 2014ء میںیہ سلسلہ شروع ہوا، جتھے آ کر محاصرہ شہر کو بند کرتے ہیں، 2، 4 مہینے وہاں بیٹھے رہتے ہیں اور اربوں ڈالر کی معیشت کو برباد کردیتے ہیں۔
انہوں نے کہا کہ جب بھی ملک کو خطرات درپیش ہوئے قوم متحد ہوئی، سیاسی جماعتوں کو بھی اپنا کردار ادا کرنا ہوگا۔ انہوں نے کہا کہ اسمبلی قانون سازی اور مسائل کے حل پرغور کا فورم ہے، کارروائی کے دوران ذمہ دارانہ طرزعمل کا مظاہرہ ہونا چاہئے۔انہوں نے کہا کہ سابق گورنر سندھ محمد زبیر کا نواز شریف، جنرل باجوہ کی ملاقات کا دعویٰ بے بنیاد ہے۔
انہوں نے ان کیخلاف قانونی کارروائی کا اشارہ دیتے ہوئے کہا کہ محمد زبیر سے ایسی بات کی توقع نہیں تھی، ان کی باتیں بے بنیاد ہیں ،اس سے بڑا جھوٹ کوئی نہیں ہوسکتا، محمد زبیر کے پاس لندن میں ملاقاتوںکی تفصیلات ہیں تو سامنے لیکر آئیں۔انہوں نے کہا کہ ملاقات تو دور ان کی آپس میں کوئی بات بھی نہیں ہوئی، یہ کیسی ملاقات تھی جس کا علم صرف محمد زبیر کو ہے۔
انہوں نے کہا کہ محمد زبیر کو ان الزامات پر مشکلات پیش آسکتی ہیں، دونوں فریقین کے پاس ان کے خلاف قانونی کارروائی کرنے کا حق ہے، ایک حکومت کو آئینی طریقے سے ہٹایا گیا، یہ اس پر الزام لگاتے ہیں کہ یہ ایک سازش کے تحت کیا گیا۔
انہوں نے کہا کہ پی ٹی آئی والوں نے محمد زبیر کے الزامات پر پریس ٹاک کی کہ عدالت اس پر سوموٹو ایکشن لے ،اس پر جوڈیشل کمیشن بننا چاہئے، میرا یہ خیال ہے کہ کمیشن بنانے سے قبل محمد زبیر وضاحت کریں کہ یہ ملاقات کب کہاں اور کیسے ہوئی؟۔
