اسلام آباد : مسلم لیگ (ن) کے رہنما جاوید لطیف نے دوبارہ انتخابات کرانے کا مطالبہ کرتے ہوئے کہا ہے کہ نواز شریف کی دو تہائی اکثریت کا راستہ روکا گیا، 2018ء اور حالیہ انتخابات کی تحقیقات کیلئے کمیشن قائم کیا جائے۔
تفصیلات کے مطابق نجی ٹی وی سے گفتگو کرتے ہوئے لیگی رہنماء جاوید لطیف نے ملک میں دوبارہ انتخابات کرانے کا مطالبہ کرتے ہوئے کہا ہے کہ 2018ء اور حالیہ انتخابات کی تحقیقات کیلئے کمیشن بنایا جائے ۔ انہوں نے کہا کہ ایک انتظام کے تحت موجودہ حکومت لائی گئی اور نوازشریف کی دو تہائی اکثریت کا راستہ روکا گیا۔ انہوں نے کہا کہ الیکشن سے پہلے تین سزائیں دینا بھی اسی ارینجمنٹ کا حصہ تھا۔
انہوں نے کہا کہ جو لوگ ملک میں استحکام نہیں چاہتے انہوں نے ایک ارینجمنٹ کے تحت تحریک عدم اعتماد کا ماحول بنایا تاکہ نوازشریف کی مقبولیت میں کمی اور بانی پی ٹی آئی کی مقبولیت میں اضافہ کیا جاسکے جس میں جنرل باجوہ اور فیض حمید سب ایک پیج پر تھے۔
