پشاور : گورنر خیبر پختونخوا فیصل کریم کنڈی نے آپریشن استحکام پاکستان کی حمایت کرتے ہوئے کہا ہے کہ بہتر ہوتا آپریشن بارے سیاسی جماعتوں کو اعتماد میں لیا جاتا، دہشت گردوں کی حمایت کرنیوالوں کیخلاف بھی کارروائی ہونی چاہئے۔
تفصیلات کے مطابق گورنر خیبرپختونخوا فیصل کریم کنڈی نے باچا خان مرکز میں میڈیا سے گفتگو کرتے ہوئے کہا کہ اے این پی کی اعلی قیادت سے سیکیورٹی و سیاسی معاملات پر بات ہوئی ہے۔
انہوں نے کہا کہ بحیثیت گورنر آپریشن استحکام پاکستان کی حمایت کرتا ہوں، تاہم بہتر ہوتا کہ آپریشن پر سیاسی جماعتوں کو بھی اعتماد میں لیا جاتا۔ انہوں نے کہا کہ وزیر اعلی نے صوبائی کابینہ کو اعتماد میں لئے بغیر آپریشن کی حمایت کی ،سیاسی جماعتوں کے تحفظات صدر اور وزیر اعظم کے سامنے رکھوں گا۔ انہوں نے کہا کہ جن لوگوں نے دہشت گردوں کی حمایت کی، ان کے خلاف بھی کارروائی ہونی چاہئے۔
