اسلام آباد : رکن قومی اسمبلی عبدالقادر گیلانی نے کہا ہے کہ جنوبی پنجاب سیکرٹریٹ کی بحالی اور لاہورکے برابر بجٹ دینے کا مطالبہ کرتے ہوئے کہا ہے کہ تخت لاہور سے کب ہماری جان چھوٹے گی؟، ہم نے آپ کو وزیراعظم کا ووٹ دیا آپ نے ہمیں کیا دیا؟۔
تفصیلات کے مطابق قومی اسمبلی اجلاس میں اظہار خیال کرتے ہوئے پیپلز پارٹی کے رکن قومی اسمبلی عبدالقادر گیلانی نے وزیراعظم کو مخاطب کرتے ہوئے کہا ہم نے آپ کو وزیر اعظم کا ووٹ دیا آپ نے ہمیں کیا دیا؟، ہم کسی کی مرہون منت نہیں ہیں، ہم نے پاکستان کھپے کا نعرہ لگایا، وزیر اعظم ہوتے تو بتاتے آپ پاپولر نہیں ہیں لیکن آپ کو قومی مفاد میں سپورٹ کر رہے ہیں۔
انہوں نے کہا کہ ٹیکس ملتا ہے تو لاہور کی اورنج لائن بنتی ہے، کیا ہمیں بجٹ کو منظور کرنا چاہئے۔ انہوں نے کہا کہ پی ٹی آئی دور میں جنوبی پنجاب کا سیکرٹریٹ بنایا گیا، مگر مسلم لیگ نے اسے ختم کر دیا، آج ہمیں کام کیلئے لاہور جانا پڑتا ہے، تخت لاہور سے کب ہماری جان چھوٹے گی۔
انہوں نے جنوبی پنجاب کے سیکرٹریٹ کی بحالی اور لاہور کے برابر بجٹ دینے کا مطالبہ کرتے ہوئے کہا کہ ہم مسلم لیگ (ن) کو میثاق معیشت پر سپورٹ کرنا چاہتے ہیں۔انہوں نے کہا کہ اگر اپنا گراف بڑھانا ہے تو کچھ کرنا ہوگا، سرائیکی صوبہ بنا کریڈٹ آپ لے لیں ، میں سرائیکی صوبے کا بل پیش کروں گا جو مخالفت کرے گا اسے جگہ نہیں ملے گی۔
