اسلام آباد : اسلام آباد ہائیکورٹ نے آزاد کشمیر کے لاپتہ شہری کی گرفتاری ظاہر کرنے پر درخواست نمٹا دی۔ تفصیلات کے مطابق اسلام آباد ہائیکورٹ میں جسٹس محسن اختر کیانی نے آزاد کشمیر کے لاپتہ شہری خواجہ خورشید احمد کی بازیابی بارے دائر درخواست کی سماعت کی۔ ایڈیشنل اٹارنی جنرل اور وزارت دفاع کے ڈائریکٹر لیگل عدالت کے روبرو پیش ہوئے۔
دوران سماعت ایڈیشنل اٹارنی جنرل نے بتایا کہ خواجہ خورشید احمد جاسوسی کے الزام میں ملٹری حراست میں ہیں جس پر جسٹس محسن اختر کیانی نے کہا چلیں بندے کا پتہ تو چل گیا۔جسٹس محسن اختر کیانی نے استفسار کیا کہ کیا وہ ملٹری سے ریٹائرڈ ہیں؟ ایڈیشنل اٹارنی جنرل منور اقبال دوگل نے بتایا کہ جی وہ ملٹری سے ریٹائرڈ ہیں۔
عدالت نے درخواست گزار کے وکیل کو ہدایت کی کہ آپ قانون کے مطابق متعلقہ فورم سے رجوع کر سکتے ہیں۔درخواست گزار کے وکیل نے استدعا کی کہ ہمیں ان کے جواب کی کاپی دے دیں، جسٹس محسن اختر کیانی نے کہا کہ بالکل آپ کاپی لے لیں ۔ بعد ازاں عدالت نے لاپتہ شہری سے متعلق درخواست نمٹا دی۔
