اسلام آباد: چیئرمین پی ٹی آئی بیرسٹر گوہر نے بھوک ہڑتالی کیمپ لگانے کا اعلان کرتے ہوئے کہا ہے کہ پی ٹی آئی پر کوئی پابندی نہیں لگ سکتی، ہمیشہ دہشت گردی کی مذمت کی، کسی سے حب الوطنی کا سرٹیفکیٹ لینے کی ضرورت نہیں، چیف جسٹس مخصوص نشستوں بارے فیصلے پر عمل کروائیں۔
تفصیلات کے مطابق اسلام آباد میں میڈیا سے گفتگو کرتے ہوئے چیئرمین پی ٹی آئی بیرسٹر گوہر نے کہا کہ رؤف حسن و دیگر کارکنان کا 10 روز کا ریمانڈ مانگا گیا تاہم ہم نے رؤف حسن و دیگر کارکنان کو کیس سے ڈسچارج کرنے کی استدعا کی تھی ، عدالت کو بتایا کہ رؤف حسن کی عمر 75سال ہے اور وہ کینسر کے مریض ہیں۔انہوں نے کہا کہ ہم نے عدالت کو بتایا ہے کہ پولیس اہلکار آفس میں موجود واٹر ڈسپنسر سمیت سب کچھ لے گئے ہیں جبکہ اقلیتوں کیلئے مخصوص نشستوں کیلئے آنے والوں کو پکڑ لیا گیا ہے۔
انہوں نے کہا کہ پی ٹی آئی دہشت گردی کی ہر شکل کی مذمت کرتی رہی ہے اور کرتی رہے گی، پی ٹی آئی محب وطن تھی، ہے اور رہے گی، ہمیں کسی سے حب الوطنی کا سرٹیفکیٹ لینے کی ضرورت نہیں ہے ۔ انہوں نے کہا کہ بانی پی ٹی آئی کی جماعت پر کوئی پابندی نہیں لگ سکتی۔ انہوں نے کہا کہ جنہوں نے پانچ انکوائریاں شروع کروائی تھیں وہ سب ختم ہو گئی ہیں، پی ٹی آئی قانون اور آئین کی بالادستی کیلئے کھڑی ہے، یہ سارے لوگ ناکام ہوں گے، سارے اقدامات سپریم کورٹ کے فیصلے پر عملدرآمد روکنے کیلئے کئے جارہے ہیں۔
انہوں نے کہا کہ چیف جسٹس سے درخواست ہے کہ سپریم کورٹ کے مخصوص نشستوں بارے فیصلے پر عمل کروانا آپ کی ذمہ داری ہے۔انہوں نے کہا کہ آج ہماری سپیکر قومی اسمبلی سے بھی ملاقات ہے۔انہوں نے بتایا کہ آج ہم بھوک ہڑتالی کیمپ لگا رہے ہیں، کیمپ روٹیشن کیساتھ چلائیں گے، ہمارے ارکان اسمبلی اس میں شرکت کریں گے۔
انہوں نے کہا کہ بھارتی آرمی چیف کے بیان کی مذمت کرتے ہیں، پاک فوج مضبوط تھی اور پاکستان کے تحفظ کیلئے مضبوط رہے گی۔
