اسلام آباد: ایف بی آر نے آئی ایم ایف کی شرط پر عملدرآمد کرتے ہوئے تاجر دوست سکیم کا دائرہ کار 42 شہروں تک بڑھا دیا ہے ،رجسٹرڈ تاجروں کو ماہانہ 100سے ہزار تک ایڈوانس ٹیکس دینا ہوگا ،تعین دکانوں کی فیئر مارکیٹ ویلیو کے حساب سے کیا جائیگا۔
اطلاعات کے مطابق ایف بی آر نے آئی ایم ایف کی شرط پر عملدرآمد کرتے ہوئے دکانداروں اور چھوٹے تاجروں کو ٹیکس نیٹ میں لانے اور ان سے ٹیکس وصولی کیلئے تاجر دوست سکیم کا دائرہ کار 42 شہروں تک بڑھا دیا ۔جاری نوٹیفکیشن کے مطابق سکیم میں ایبٹ آباد، اٹک، بہاولنگر، بہاولپور، چکوال، ڈی آئی خان ، فیصل آباد، گھوٹکی، گجرات، گوادر، حافظ آباد، ہری پور، حیدرآباد، اسلام آباد، جھنگ، جہلم، قصور، خوشاب، لاہور، لاڑکانہ، لسبیلہ، لودھراں، منڈی بہاؤالدین، مانسہرہ، مردان، میرپور خاص، ملتان، ننکانہ، نارووال، پشاور، کوئٹہ، رحیم یار خان، راولپنڈی، ساہیوال، سرگودھا، شیخوپورہ، سیالکوٹ، سکھر اور ٹوبہ ٹیک سنگھ کو بھی شامل کرلیا گیا ہے۔
سکیم کے تحت رجسٹرڈ تاجروں کو ماہانہ 100سے ایک ہزار روپے تک ایڈوانس ٹیکس دینا ہوگا جس کا تعین دکانوں کی فیئر مارکیٹ ویلیو کے حساب سے کیا جائے گا جبکہ دکانوں کی فیئر مارکیٹ ویلیو کا تعین ایف بی آر خود کرے گا۔
ذرائع کے مطابق سکیم کا اطلاق چھوٹے تاجروں، دکانداروں، ہول سیلرز، ریٹیلرز، مینوفیکچررز کم ریٹیلرز، امپورٹر کم ریٹیلرز پر ہوگا،تاجر اور دکاندار ٹیکس آسان موبائل ایپ یا ایف بی آر کی ویب پورٹل پر رجسٹریشن کروا سکیں گے جبکہ رضاکارانہ طور پر خود کو رجسٹر نہ کرنے کی صورت میں ایف بی آر خود سے مذکورہ تاجر کو نیشنل بزنس رجسٹری میں شامل کرےگا۔
