اسلام آباد: وزیراعظم شہباز شریف نے ملکی برآمدات سالانہ 60 ارب ڈالر تک لے جانے کا ہدف دیتے ہوئے کہا ہے کہ ملکی ترقی کیلئے سب کو محنت کرنی ہوگی، ایف بی آر کی جانب سے برآمد کنندگان کے ریفنڈز میں تعطل قبول نہیں کیا جائے گا،وزارت تجارت برآمدات کی استعداد رکھنے والے شعبوں کے نمائندوں سے مل کر تجاویز کو حتمی شکل دے، معیاری بیج و زرعی اجناس کی مزید پراسیسنگ کرکے برآمد یقینی بنائی جائے،برآمدات کی شپنگ بارے مسائل فوری حل کرکے یورپ و امریکا پاکستانی سامان کی ترسیل کا دورانیہ کم کیا جائے۔
تفصیلات کے مطابق وزیراعظم شہباز شریف کی زیر صدارت قومی ترقی برآمدات بورڈ کا اجلاس ہوا جس میں نائب وزیراعظم و وزیر خارجہ اسحاق ڈار، وفاقی وزراء جام کمال خان، احد خان چیمہ، قیصر احمد شیخ، عبدالعلیم خان، احسن اقبال، رانا تنویر حسین، محمد اورنگزیب، سردار اویس خان لغاری، ڈاکٹر مصدق ملک، وزرا مملکت علی پرویز ملک، شزہ فاطمہ خواجہ، ڈپٹی چیئرمین پلاننگ کمیشن جہانزیب خان، گورنر سٹیٹ بینک، وزیراعظم کے کوارڈنیٹر رانا احسان افضل ،چیئرمین ایف بی آر، متعلقہ افسران اور بڑی تعداد میں مختلف شعبوں بشمول ٹیکسٹائل، انفارمیشن ٹیکنالوجی، لیدر، زراعت سے تعلق رکھنے والے برآمد کندگان نے شرکت کی۔اجلاس کو حکومت کی جانب سے برآمدی صنعت کی ترقی کیلئے اٹھائے گئے اقدامات پر بریفنگ دی گئی۔
اجلاس کو بتایا گیا کہ پاکستانی کی رواں برس برآمدات 30 ارب ڈالر سے تجاوز کر گئی ہیں جنہیں دو گنا کرنے کیلئے آئندہ پانچ سالہ منصوبہ بھی پیش کیا گیا۔اجلاس سے گفتگوکرتے ہوئے وزیر اعظم شہباز شریف نے کہا کہ الحمد اللہ گزشتہ مالی سال ملکی برآمدات 30ارب ڈالر سے زیادہ رہیں، حکومتی پالیسیوں کی بدولت انفارمیشن ٹیکنالوجی برآمدات کا 3.2ارب ڈالر سے تجاوز کرنا خوش آئند امر ہے۔
انہوں نے کہا کہ پاکستان کی ترقی کیلئے سب کو محنت کرنا ہوگی، مشکل حالات کے باوجود برآمدات بڑھانے میں کردار ادا کرنیوالی کاروباری شخصیات اور سرمایہ کاروں کو سلام پیش کرتا ہوں۔ انہوں نے ہدایت کی کہ برآمد کنندگان کے نشاندہی کردہ مسائل کو آئندہ دو ہفتے میں حل کرکے رپورٹ پیش کی جائے،ہر ڈیڑھ ماہ بعد قومی قومی برآمدات بورڈ کے اجلاس کی خود صدارت کروں گا۔
وزیراعظم نے وزارت تجارت و متعلقہ ادارے کو آئندہ تین سال میں برآمدات کا ہدف سالانہ60ارب ڈالر تک کرنے کیلئے عملی اقدامات اٹھانے کی ہدایت کی۔
انہوں نے کہا کہ وزارت تجارت برآمدات کی استعداد رکھنے والے شعبوں کے نمائندوں کیساتھ مل کر پالیسی تجاویز کو حتمی شکل دے جبکہ زرعی برآمدات میں مزید اضافے کیلئے وزارت قومی غذائی تحفظ صوبوں کیساتھ مل کر ایکسٹینشن سروسز کی بہتری کیلئے کام کرے، معیاری بیج اور زرعی اجناس کی مزید پراسیسنگ کرکے ان کی برآمد یقینی بنائی جائے۔
وزیر اعظم نے ہدایت دی کہ زرعی اجناس کی زیادہ پیداوار والی اقسام کو متعارف کرانے کیلئے اقدامات کو تیز کیا جائے، برآمدات کی شپنگ بارے مسائل کو فوری حل کرکے یورپ و امریکا پاکستانی سامان کی ترسیل کا دورانیہ کم کیا جائے۔
وزیراعظم نے حکم دیا کہ وزارت تجارت سرمایہ کاری بورڈ سے چینی برآمدی صنعتوں کی پاکستان منتقلی کے حوالے سے تعاون یقینی بنائے۔وزیراعظم نے کہا کہ پاکستانی اشیاء کی برآمدات میں اضافے اور منفرد پہچان بنانے کیلئے ریسرچ اینڈ ڈویلپمنٹ، جدت اور برانڈ ڈویلپمنٹ پر کام کیا جائے، ایف بی آر کی جانب سے برآمد کنندگان کے ریفنڈز میں کسی قسم کا تعطل قبول نہیں کیا جائے گا۔
انہوں نے کہا کہ دنیا بھر میں پاکستانی سفارتخانوں میں ٹریڈ افسران ان ممالک میں پاکستانی اشیاء کی برآمد اور پاکستانی برآمد کنندگان کی رہنمائی میں کردار ادا کریں۔انہوں نے کہا کہ صنعتوں کیلئے بجلی لاگت کو کم کرنے کیلئے وزارت بجلی جامع منصوبہ پیش کرے۔
وزیراعظم نے کہا کہ دنیا بھر میں نجی شعبہ کسی بھی ملک کی ترقی میں کلیدی کردار ادا کرتا ہے، نجی شعبے کے مسائل کے حل کیلئے انہیں پالیسی کی تشکیل کے عمل کا حصہ بنایا جائے۔اس موقع پر برآمدی صنعتوں کے نمائندوں نے وزیر اعظم کو مسائل کے حل کیلئے تسلسل سے ملاقاتوں پر خراج تحسین پیش کرتے ہوئے کہا کہ وزیر اعظم کی برآمدی شعبے میں خصوصی دلچسپی صنعتکاروں کیلئے حوصلہ افزا ہے۔ برآمد کنندگان نے وزیر اعظم کے برآمدی صنعت کو ایف بی آر کی جانب سے بروقت ریفنڈز کی فراہمی کے اقدام کی تعریف کی۔
