اسلام آباد: وزیراعظم شہبازشریف نے وفاقی وزارتوں کی استعدادکار ،سرمایہ کاری بڑھانے کیلئے سٹیئرنگ کمیٹی تشکیل دینے کی ہدایت کرتے ہوئے کہا ہے کہ ملک میں سرمایہ کاری میں اضافہ حکومت کی اولین ترجیح ہے،حکومت تاجروں ، سرمایہ کاروں کو کاروبار دوست ماحول کی فراہمی کیلئے ہر ممکن اقدامات اٹھا رہی ہے۔
پیر کو جاری بیان کے مطابق وزیراعظم شہباز شریف کی زیر صدارت ملک میں سرمایہ کاری میں اضافے ،حکومتی اداروں کی استعداد کار میں بہتری بارے اجلاس کا انعقاد ہواجس میں وفاقی وزیر اقتصادی امور احد خان چیمہ،وفاقی وزیر خزانہ محمد اورنگزیب،وفاقی وزیر منصوبہ بندی احسن اقبال، وزیر مملکت خزانہ علی پرویز ملک ، ڈپٹی چیئرمین پلاننگ کمیشن جہانزیب خان ، وزیراعظم کے کوآرڈنیٹر رانا احسان افضل اور متعلقہ اعلی سرکاری افسران نے شرکت کی۔
اجلاس کو بتایا گیا کہ پبلک پرائیویٹ پارٹنرشپ اتھارٹی کی جانب سے وفاقی وزارتوں کی استعداد بڑھانے اور سرمایہ کاری میں اضافے کیلئے ماہرین کی خدمات کے حصول کیلئے عالمی کنسلٹنسی فرم کئیارنی کی خدمات حاصل کی گئی ہیں۔
کئیارنی حکومت کیساتھ مشاورت میں پائیدار ترقی کیلئے منصوبہ بندی کا لائحہ عمل تیار ،سرکاری اداروں کا ریگولیٹری فریم ورک بہتر بنانے ،سرمایہ کاروں کو راغب کرنے ،ریاستی ملکیتی اداروں کی نجکاری بارے حکومت کو معاونت فراہم کرے گی۔
کئیارنی کی جانب سے وزیراعظم کو بتایا گیا کہ کئیارنی اب تک وفاقی حکومت کے 15اداروں کیساتھ مشاورت کر چکی ہے جس میں 97ترجیحی منصوبوں کی نشاندہی کی گئی ہے۔اجلاس سے گفتگو کرتے ہوئے وزیراعظم شہباز شریف نے کہا کہ ملک میں سرمایہ کاری میں اضافہ حکومت کی اولین ترجیح ہے،حکومت تاجروں اور سرمایہ کاروں کو کاروبار دوست ماحول کی فراہمی کیلئے ہر ممکن اقدامات اٹھا رہی ہے۔
وزیراعظم نے سرمایہ کاری و حکومتی استعداد کار میں بہتری کے ایسے منصوبے جن بارے جلد نتائج برآمد ہونے کے امکانات ہیںکیلئے فی الفور موثر اقدامات اٹھانے کی ہدایت کی۔وزیراعظم نے اپنی سربراہی میں وفاقی وزارتوں کی استعداد کار و سرمایہ کاری بڑھانے پر پیشرفت بارے سٹیئرنگ کمیٹی تشکیل دینے کی ہدایت کی۔
