چین کے مشرقی شہر شنگھائی میں امریکی کار ساز کمپنی ٹیسلا کی میگا فیکٹری کا بیرونی منظر۔ (شِنہوا)
بیجنگ (شِنہوا) عالمی تجارتی کشیدگی اور تحفظ پسندی میں اضافے کے بیچ چین اعلیٰ معیار کے کھلے پن کو وسعت دینے اور غیر ملکی سرمایہ کاری کے لئے اپنی ترغیب کو مضبوط بنانے کی کوششوں میں تیزی لا رہا ہے، جس کے ذریعے عالمی کاروباری اداروں کو انتہائی ضروری اعتماد اور موقع فراہم کئے جا رہے ہیں۔
غیر ملکی سرمایہ کاری کو راغب کرنے کے لئے ایک جامع لائحہ عمل پیش کرنے سے لے کر سرمایہ کاری کے لئے مارکیٹ تک رسائی کی پابندیوں کو مزید آسان بنانے تک چین غیر ملکی سرمایہ کاری کے لئے اپنی حیثیت کو مستحکم کرنے کی خاطر اپنی وسیع مقامی منڈی، متحرک جدیدیت اور طویل مدتی معاشی لچک سے فائدہ اٹھا رہا ہے۔
چین کے نائب وزیر تجارت اور بین الاقوامی تجارت کے نائب نمائندے لنگ جی نے ایک پریس کانفرنس میں کہا کہ غیر ملکی سرمایہ کاری چین کی اصلاحات اور وسعت کی گواہ اور معاون رہی ہے۔
لنگ جی کے مطابق غیر ملکی سرمایہ کاری والے کاروباری ادارے اب چین کے روزگار کا تقریباً 7 فیصد، ٹیکس آمدنی کا 7 واں حصہ اور اس کی درآمدات اور برآمدات میں تقریباً ایک تہائی حصہ ڈالتے ہیں۔
وزارت تجارت کے ایک عہدیدار ژو بنگ نے پریس کانفرنس میں کہا کہ ملٹی نیشنل کمپنیاں چین میں سرمایہ کاری کے طویل مدتی امکانات کے بارے میں پرامید ہیں اور ملک میں اپنی موجودگی کو بڑھانے کے لئے آمادہ ہیں۔
اگرچہ عالمی مندی میں چینی مین لینڈ میں براہ راست غیر ملکی سرمایہ کاری (ایف ڈی آئی) کم رہی ہے تاہم بہتری کے اشارے سامنے آنا شروع ہوگئے ہیں۔ جنوری میں چینی مین لینڈ میں براہ راست غیر ملکی سرمایہ کاری 97.59 ارب یوآن (تقریباً 13.61 ارب امریکی ڈالر) رہی جو گزشتہ ماہ کے مقابلے میں 27.5 فیصد زیادہ ہے۔
برطانیہ، جمہوریہ کوریا، نیدرلینڈز اور جاپان سے براہ راست غیر ملکی سرمایہ کاری میں گزشتہ ماہ بالترتیب 324.4 فیصد، 104.3 فیصد، 76.1 فیصد اور 40.7 فیصد اضافہ ہوا۔
غیر ملکی سرمایہ کاری کی حوصلہ افزائی کے لئے ملک کی تازہ ترین کوششوں میں غیر ملکی سرمایہ کاری کو مستحکم کرنے کے لئے ایک نیا لائحہ عمل پیش کیا گیا ، جس میں 4 پہلوؤں میں 20 مخصوص اقدامات شامل ہیں جن میں مختلف شعبوں میں منڈی تک رسائی کو مزید بڑھانا اور سرمایہ کاری کو فروغ دینے کی کوششوں میں اضافہ شامل ہے۔
