اسلام آباد : پاکستان اور آذر بائیجان نے تجارت و سرمایہ کاری کا حجم2 ارب ڈالر تک بڑھانے پر اتفاق کرلیا۔ تفصیلات کے مطابق پاکستان اور آذربائیجان نے تجارت اور سرمایہ کاری کو100ملین ڈالر کی سطح سے بڑھا کر2ارب ڈالر تک کرنے پر اتفاق کیا ہے۔
اس حوالے سے دونوں ممالک نے15مفاہمتی یادداشتوں اور معاہدوں پر دستخط کئے ہیں، جو تجارت، سیاحت، معدنیات، سائنس و ٹیکنالوجی، قانون و انصاف اور ثقافتی تبادلے کے پروگراموں پر مبنی ہیں۔ذرائع کے مطابق یہ معاہدے اور یادداشتیں رواں برس نومبر میں وزیر اعظم پاکستان کے آذربائیجان کے دورے سے منسلک ہیں،معاہدوں کی تکمیل میں ایس آئی ایف سی نے سہولت کاری اور مشترکہ پلیٹ فارم فراہم کیا ہے ،یہ معاہدے اور یادداشتیں آذربائیجان کے صدر الہام علیوف کے دورہ پاکستان کے دوران طے کئے جائیں گے۔
اس کے علاوہ دونوں ممالک باہمی تجارت میں پیٹرولیم اور توانائی شعبوں میں بھی سرمایہ کاری کے خواہاں ہیں، معاہدوں سے دونوں ممالک کے درمیان تعاون اور بھائی چارے کو مزید فروغ ملے گا۔
