اسلام آباد: وفاقی وزارت تعلیم نے وفاقی سکولو ں کو شمسی توانائی پر منتقل کرنے کا فیصلہ کیا ہے جس کے تحت رواں سال کے آخر تک 100پرائمری سکولوں کو شمسی توانائی پر منتقل کیاجائے گا۔ تفصیلات کے مطابق وفاقی وزارت تعلیم نے اسلام آباد کے سکولوں کو شمسی توانائی پر منتقل کرنے کا فیصلہ کیا ہے جس پر اگلے دو ماہ میں کام شروع کردیا جائے گا۔
منصوبے کے تحت پہلے 100 پرائمری سکولو ں کو رواں سال کے آخر تک شمسی توانائی پر منتقل کیا جائے گا۔ ترجمان وزارت تعلیم کے مطابق منصوبے کا مقصد بجلی لاگت کم کرنا اور پائیداری کو فروغ دینا ہے۔
ترجمان کے مطابق اقدام قابل تجدید توانائی کے ذرائع کو استعمال کرنے ،شہر کے کاربن فٹ پرنٹ کو کم کرنے کی کوشش کا بھی حصہ ہے، منصوبہ نہ صرف بجلی کی لاگت کم کرے گا بلکہ سکولوں کیلئے توانائی کا ایک صاف اور پائیدار ذریعہ بھی فراہم کرے گا۔
ترجمان نے بتایا کہ منصوبے میں منتخب سکولوں کی چھتوں پر سولر پینلز کی تنصیب شامل ہوگی، شمسی توانائی کا نظام ہر سکول کی توانائی ضروریات پورا کرنے کیلئے ڈیزائن کیا جائے گا۔ ترجمان کے مطابق اقدام سے وزارت کو سالانہ کروڑوں روپے بجلی اخراجات کی بچت ہوگی اور رقم بچوں کی تعلیمی سہولیات بہتر بنانے کیلئے استعمال کی جائے گی۔
