اسلام آباد :سابق نگران وزیر تجارت گوہر اعجاز نے کہا ہے کہ رواں سال کے پہلے 3 ماہ میں آئی پی پیز کو 450ارب روپے کی ادائیگی کی گئی،ہماری حلال کی کمائی 40 خاندانوں میں کیپسٹی پیمنٹس کی مد میں ادا کی جارہی، آدھے آئی پی پیز10 فیصد سے کم صلاحیت پر چل رہے، 4 پاور پلانٹس بغیر بجلی پیدا کئے 10 ارب روپے ماہانہ وصول کررہے ہیں۔
تفصیلات کے مطابق سابق نگران وزیر تجارت گوہر اعجاز نے سوشل میڈیا پر کیپسٹی پیمنٹس کا ڈیٹا شیئر کردی۔ گوہر اعجاز کے مطابق رواں سال کے پہلے 3ماہ (جنوری تا مارچ )کے دوران خود مختار پاور پروڈیوسرز کو 450ارب روپے کی بھاری ادائیگیاں کی گئیں۔
انہوں نے بتایا کہ مختلف آئی پی پیز کو جنوری سے مارچ 2024کے دوران ماہانہ 150ارب روپے ادا کئے گئے ہیں ۔انہوں نے بتایا کہ آئی پی پیز میں سے آدھے 10فیصد سے بھی کم کپیسٹی پر چل رہے ہیں، 4پاور پلانٹس بجلی پیدا کئے بغیر 10ارب روپے ماہانہ لے رہے ہیں۔
انہوں نے کہا کہ ہماری حلال کمائی 40خاندانوں میں کپیسٹی پیمنٹس کی مد میں ادا کی جاتی ہے۔ انہوں نے نیپرا میں تمام سٹیک ہولڈرز کو نمائندگی دینے اور پاور پلانٹس کو بجلی پیدا کرنے پر ہی ادائیگی کرنے کا مطالبہ کیا۔ انہوں نے کہاکہ حکومت عوام کے پیسے پرکاروبار ،صارفین کے ساتھ زیادتی نہ کرے۔
