اسلام آباد: وفاقی وزیر نجکاری عبدالعلیم خان نے کہا ہے کہ پاک چین کمپنیوں کے درمیان جوائنٹ وینچر کیلئے حکمت عملی کو حتمی شکل دے دی ہے، 7بڑے شعبوں میں سرمایہ کاری کیلئے چینی کمپنیوں کو عدہ کیا جائے گا،خارجہ، تجارت، صنعت و پیداوار، فوڈ سکیورٹی ،میری ٹائم وزارتوں اور بیجنگ میں پاکستانی سفارتخانے کو آن بورڈ لیا جائے۔
تفصیلات کے مطابق ہفتہ کو وفاقی وزیر نجکاری و وزیر تجارت جام کمال خان کی زیر صدارت پاک چین تجارتی امور پر اعلی سطحی اجلاس کا انعقاد ہوا۔ وفاقی وزیر نجکاری عبدالعلیم خان نے کہا کہ چینی و پاکستانی کمپنیوں کے مابین جوائنٹ وینچر کیلئے حکمت عملی کو حتمی شکل دے دی گئی ہے،پاکستان 7بڑے شعبوں میں سرمایہ کاری کیلئے چینی کمپنیوں کو مدعو کرے گا جن میں طبی آلات، پلاسٹک، کلوتھنگ، لیدر، گوشت، فروٹ و سبزیاں اور ویسٹ و چارہ شامل ہیں۔
انہوں نے بتایا کہ جوائنٹ وینچر میں چین سے 78اورپاکستان سے167کاروباری ادارے شریک ہوں گے۔انہوں نے کہا کہ بنگلہ دیش، بھارت ، ویت نام کے مقابلے میں پاکستان میں سرمایہ کاری زیادہ پرکشش ہے۔ انہوں نے سرمایہ کاری بورڈ کو وزیر اعظم کیلئے تفصیلات تیار و پیش کرنے کی ہدایت کرتے ہوئے کہا کہ خارجہ، تجارت، صنعت و پیداوار، فوڈ سکیورٹی ،میری ٹائم وزارتوں اور چینی کمپنیوں کیلئے بیجنگ میں پاکستانی سفارتخانے کو آن بورڈ لیا جائے۔
انہوں نے کہا کہ چینی کمپنیوں کے اشتراک سے تجارت میں ایک ارب ڈالر کا اضافہ ہو سکتا ہے۔وفاقی وزیر سرمایہ کاری نے کہا کہ پاکستان چین سے مختلف شعبوں میں دو طرفہ تجارت کے نئے دروازے کھولنا چاہتا ہے، نئی صنعتیں وہاں لگائی جائیں جہاں بجلی کی زیادہ سے زیادہ فراہمی ممکن ہو سکے۔انہوں نے بورڈ آف انویسٹمنٹ حکام کو سرمایہ کار کمپنیوں سے فوری بات چیت کی ہدایت کی۔اس موقع پر وفاقی وزیر جام کمال نے بھی وزارت تجارت کو بورڈ آف انوسٹمنٹ سے مکمل تعاون اور مشترکہ کاوشوں کی ہدایت کی۔
