اسلام آباد: وزیراعظم شہباز شریف نے مسقط کی امام بارگاہ میں دہشت گرد حملے کی مذمت اورعمان کو دہشت گردی سے نمٹنے کیلئے تعاون کی پیشکش کرتے ہوئے تجارت، توانائی، دفاع سمیت مختلف شعبوں میں تعاون بڑھانے کی خواہش کا اظہار کیا۔تفصیلات کے مطابق ہفتہ کو وزیراعظم شہباز شریف سے عمان کے سفیر فہد سلیمان خلف الخروسی نے ملاقات کی۔
وزیراعظم نے مسقط کے ضلع وادی کبیر میں امام بارگاہ پر دہشت گرد حملے کی مذمت کرتے ہوئے شہید پاکستانیوں کی میتوں کی واپسی اور زخمیوں کے علاج کیلئے عمانی حکومت کے تعاون کو سراہا۔ وزیراعظم نے عمانی سلطان ہیثم بن طارق کیلئے نیک خواہشات کا اظہار کرتے ہوئے دہشت گردی سے نمٹنے کیلئے تعاون کی پیشکش کی۔
وزیراعظم نے عمان کیساتھ تجارت، توانائی، دفاع سمیت مختلف شعبوں میں تعاون بڑھانے کی خواہش کا اظہار کرتے ہوئے کہا کہ دونوں ممالک کے تعلقات مشترکہ تاریخ، عقیدے اور ثقافت پرمبنی ہیں۔وزیراعظم نے تجارت و سرمایہ کاری میں تعاون کیلئے عمانی وفد کے دورہ پاکستان کی ترغیب پر فہد سلیمان خلف الخروسی سے اظہار تشکر کرتے ہوئے کہا کہ باہمی طور پر مفید نتائج کے حصول کیلئے عمان کے وفد کو مکمل تعاون فراہم کریں گے۔
اس موقع پر عمانی سفیر نے سلطان عمان کی طرف سے وزیراعظم شہبازشریف کیلئے نیک خواہشات کا اظہار کرتے ہوئے پاکستان کیساتھ تجارتی اور سرمایہ کاری کے تعلقات بڑھانے کی خواہش کا اعادہ کیا۔
