لاہور: سی ٹی ڈی پنجاب نے گجرات میں کارروائی کے دوران اسامہ بن لادن کے قریبی ساتھی دہشت گرد امین الحق کو گرفتار کرلیا۔تفصیلات کے مطابق سی ٹی ڈی پنجاب نے انٹلیجنس معلومات پر گجرات میں آپریشن کے دوران القاعدہ کے سابق سربراہ اسامہ بن لادن کے قریبی ساتھی امین الحق کو گرفتار کرلیا۔
ترجمان کے مطابق دہشت گرد امین الحق کا نام اقوام متحدہ کی عالمی دہشت گردوں کی فہرست میں شامل ہے۔ ترجمان کے مطابق ملزم کیخلاف مقدمہ درج کر کے مزید تفتیش شروع کردی گئی ہے۔ترجمان کے مطابق سی ٹی ڈی محفوظ پنجاب کے ہدف پر عمل پیرا ہے اور دہشت گردی کے ناسور کو جڑ سے اکھاڑ پھینکنے کیلئے پر عزم ہے۔
دوسری جانب لاہور میں ڈی آئی جی سی ٹی ڈی عثمان اکرم گوندل نے پریس کانفرنس کرتے ہوئے کہا کہ عالمی سطح پر امین الحق اسامہ بن لادن کے سیکیورٹی سپروائزر کے طور پر جانا جاتا تھا۔انہوں نے کہا کہ اس سے قبل امین الحق 2007ء میں گرفتار ہوا تھا اور 4سال سزا کاٹی تھی، اس کے بعد یہ اگست 2021ء میں افغانستان میں دکھائی دیا جو حال ہی میں پاکستان داخل ہوا۔
انہوں نے کہا کہ اس سطح کا دہشتگرد پاکستان میں کیا کر رہا تھا؟، کیسے آیا؟، تفتیش کر رہے ہیں۔انہوں نے کہا کہ اس دہشت گرد کے پاس پاکستان کا آئی ڈی کارڈ بھی ہے جس پر لاہور اور ہری پور کے ایڈریس درج ہیں۔ انہوں نے کہا کہ گرفتار دہشت گرد کو رجسٹرڈ کیس میں سزا بھگتنی پڑے گی۔
