چیف جسٹس یحییٰ آفرید ی نے سپریم کورٹ میں 7نئے ججز کی تعیناتی کے بعد کیس مینجمنٹ کمیٹی سمیت متعدد انتظامی کمیٹیوں کی تشکیل نو کر دی۔ رجسٹرار کی جانب سے جاری نوٹیفکیشن کے مطابق جسٹس مسرت ہلالی کو خیبر پختونخوا ،جسٹس ملک شہزاد کو پنجاب، جسٹس ہاشم کاکڑ کو بلوچستان ،جسٹس صلاح الدین پنہور کو سندھ جبکہ جسٹس عامر فاروق کو اسلام آباد کی انسداد دہشتگردی عدالتوں کا نگران مقرر کیا گیا ہے۔ نوٹیفکیشن کے مطابق سپریم کورٹ بلڈنگ کمیٹی کی سربراہی جسٹس جمال مندوخیل کے سپرد کی گئی ہے ،جسٹس شفیع صدیقی اور جسٹس عامر فاروق بلڈنگ کمیٹی کے ممبران ہونگے، چیف جسٹس یحییٰ آفریدی آئی ٹی کمیٹی کی سربراہی کریں گے جبکہ جسٹس محمد علی مظہر اور جسٹس میاں گل حسن کمیٹی کے ممبران ہونگے۔بیان کے مطابق ریسرچ سینٹر کمیٹی کی سربراہی جسٹس شاہد بلال حسن کے سپرد کی گئی ہے ،جسٹس شفیع صدیقی اور جسٹس عامر فاروق کمیٹی کے ممبران ہونگے، جسٹس محمد علی مظہر لا کلرک پروگرام کمیٹی کے سربراہ، جسٹس میاں گل حسن ممبر ہونگے۔
نوٹیفکیشن کے مطابق مختلف نوعیت کی چیمبر اپیلز سننے کیلئے پانچ ججز کو نامزد کیا گیا ہے جن میں چیف جسٹس یحییٰ آفریدی، جسٹس حسن اظہر رضوی، جسٹس ہاشم کاکڑ ،جسٹس صلاح الدین پنہور اور جسٹس شکیل احمد شامل ہیں۔ سپریم کورٹ آرکائیو اینڈ میوزیم کمیٹی کی سربراہی جسٹس حسن اظہر رضوی کریں گے، جسٹس صلاح الدین پنہور، جسٹس میاں گل حسن اورنگزیب آرکائیو کمیٹی کے ممبران ہونگے۔
فوری انصاف اور ماڈل کورٹس سے متعلق کمیٹی کی سربراہی جسٹس ملک شہزاد کریں گے، جسٹس ہاشم کاکڑ، جسٹس صلاح الدین پنہور،جسٹس اشتیاق ابراہیم کمیٹی کے رکن ہونگے۔ جسٹس اشتیاق ابراہیم کو سکیورٹی جج تعینات کیا گیا ہے وہ سپریم کورٹ بلڈنگ، برانچ رجسٹر ی اور ججز کالونی کے سکیورٹی امور دیکھیں گے۔ جسٹس میاں گل حسن اورنگزیب کو فیملی اور بچوں کی حوالگی کیسز میں پاک برطانیہ پروٹوکول کا رابطہ کار جج تعینات کیا گیا ہے ۔
نوٹیفکیشن کے مطابق کیس مینجمنٹ کمیٹی کی نئی تشکیل بھی کردی گئی ہے جس کے سربراہ چیف جسٹس یحییٰ آفریدی ہوں گے جبکہ کمیٹی میں جسٹس نعیم افغان ،جسٹس شاہد بلال حسن،جسٹس شفیع صدیقی ،ایڈیشنل رجسٹرار اور ڈائریکٹر آئی ٹی شامل ہیں۔نوٹیفکیشن کے مطابق سپریم کورٹ عملے کے یونیفارم کی کوالٹی چیک کرنے کیلئے قائم کمیٹی تحلیل کر دی گئی ہے ۔
